ఐపీఎల్ చరిత్రలో అత్యంత విధ్వంసకర ఓపెనింగ్ జోడీలలో రాయల్ ఛాలెంజర్స్ బెంగళూరుకు చెందిన విరాట్ కోహ్లీ – క్రిస్ గేల్ జోడీ ఒకటి. అయితే, ఐపీఎల్ 2026లో అంతకంటే ప్రమాదకరమైన జోడీ ఉందని భారత మాజీ క్రికెటర్ చతేశ్వర్ పుజారా అభిప్రాయపడ్డారు.
పుజారా ఏమన్నారంటే: స్టార్ స్పోర్ట్స్ చర్చా కార్యక్రమంలో పుజారా మాట్లాడుతూ, “గత కొన్ని సీజన్లుగా సన్‌రైజర్స్ హైదరాబాద్ ఓపెనర్లు ట్రావిస్ హెడ్ – అభిషేక్ శర్మ ఆడుతున్న తీరు చూస్తుంటే, ఐపీఎల్ చరిత్రలోనే వీరు అత్యంత ప్రమాదకరమైన జోడీ అని నేను ఖచ్చితంగా చెప్పగలను. తొలి బంతి నుంచే అటాక్ చేయడం వీరి ప్రత్యేకత. వీరి వల్లే SRH వరుసగా 250 పైచిలుకు స్కోర్లు సాధించగలిగింది,” అని కొనియాడారు.
గేల్ – కోహ్లీ జోడీ అగ్రెసివ్‌గా ఆడినా, ప్రస్తుత పరిస్థితుల్లో హెడ్ – అభిషేక్ జోడీ బౌలర్లకు కంటిమీద కునుకు లేకుండా చేస్తోందని ఆయన పేర్కొన్నారు.
SRH బలహీనతపై కూడా స్పందన: SRH కేవలం తమ హోమ్ గ్రౌండ్ (హైదరాబాద్)లో మాత్రమే భారీ స్కోర్లు చేస్తోందని, బయటి మైదానాల్లో (Away games) వారి రికార్డు అంత ఆశాజనకంగా లేదని పుజారా గుర్తుచేశారు. హెడ్, అభిషేక్ లేదా క్లాసెన్ త్వరగా అవుట్ అయితే మిగిలిన బ్యాటర్లు తడబడుతున్నారని, ఈ లోపాన్ని సరిదిద్దుకోవాలని ఆయన సూచించారు.