“గర్భస్థ శిశువుకు ఏ హానీ కలగకుండా ఇలాంటి ఆపరేషనా!”: తీవ్ర కడుపునొప్పితో విలవిలలాడిన గర్భిణి.. అత్యాధునిక విధానంలో ప్రాణాలు కాపాడిన వైద్యులు!

నవీ ముంబైలోని ఒక ప్రైవేట్ ఆసుపత్రిలో, 20 వారాల గర్భంతో ఉన్న 27 ఏళ్ల యువతి తీవ్రమైన కడుపునొప్పి, వాంతులు, కామెర్లు (జాండిస్), జ్వరం వంటి లక్షణాలతో ఎమర్జెన్సీ వార్డులో చేరింది. వైద్య పరీక్షలు నిర్వహించగా, ఆమె పిత్త వాహికలో (Bile Duct) పలు రాళ్లు పేరుకుపోయి తీవ్రమైన ఇన్ఫెక్షన్ సోకినట్లు వైద్యులు గుర్తించారు.

గర్భధారణ సమయంలో పిత్త వాహికలో రాళ్లు అడ్డుపడటం చాలా అరుదైనది మాత్రమే కాకుండా, తల్లితో పాటు బిడ్డ ప్రాణాలకూ ప్రమాదకరమైన పరిస్థితి కావడంతో వైద్యులు వెంటనే చికిత్స ప్రారంభించారు.

సాధారణంగా ఇలాంటి శస్త్రచికిత్సల్లో ఉపయోగించే ఎక్స్-రే రేడియేషన్ (Fluoroscopy) గర్భంలో ఎదుగుతున్న శిశువుకు శారీరక లోపాలు, వైకల్యాలు కలిగించే తీవ్ర ప్రమాదం ఉంది. అందుకే వైద్యులు అత్యంత అప్రమత్తతతో తమ చికిత్సా వ్యూహాన్ని మార్చారు.

శిశువుపై రేడియేషన్ ప్రభావం పడకుండా లెడ్ కవచాలను (Lead Shields) ఉపయోగించి, అతి తక్కువ స్థాయి ఇమేజింగ్ సాంకేతికతతో ప్రత్యేక ERCP (ఎండోస్కోపిక్ రెట్రోగ్రేడ్ కోలాంజియో ప్యాంక్రియాటోగ్రఫీ) విధానాన్ని అమలు చేశారు.

కేవలం 15 నిమిషాల్లోనే ముగిసిన ఈ అత్యంత సున్నితమైన చికిత్స ద్వారా పిత్త వాహికలో ఉన్న 7 నుంచి 8 మి.మీ పరిమాణంగల 15 రాళ్లను విజయవంతంగా తొలగించి, అక్కడ స్టెంట్ అమర్చారు.

దీంతో కడుపునొప్పి నుంచి తక్షణ ఉపశమనం పొందిన ఆ యువతి ప్రాణాపాయం నుంచి బయటపడి, కేవలం రెండు రోజుల్లోనే పూర్తి ఆరోగ్యంతో డిశ్చార్జ్ అయింది.

ఆ తర్వాత నిర్వహించిన ఫాలో-అప్ పరీక్షల్లో ఆమె కాలేయ పనితీరు (Liver Function), రక్త కణాల సంఖ్య పూర్తిగా సాధారణ స్థితికి చేరుకున్నాయని వైద్యులు హర్షం వ్యక్తం చేశారు.