చెన్నైలోని అడయార్ ఇందిరా నగర్‌లో ఉన్న మున్సిపల్ కార్పొరేషన్ పార్కును స్థానిక ప్రజలు ఎక్కువగా ఉపయోగిస్తుంటారు. ఈ ప్రాంతంలో దాదాపు 5,000 కంటే ఎక్కువ కాకులు ఉండటం వల్ల స్థానికులు దీనిని ‘కాకా పార్క్’ (కాకుల పార్కు) అని పిలుచుకుంటారు.
ఘటన నేపథ్యం: గత కొద్దిరోజులుగా ఈ ప్రాంతంలో కాకులు వింతగా మరణిస్తున్నాయి. మొదట కొన్ని కాకులు చనిపోగా, ఆ తర్వాత రోజుకు 6 నుండి 7 కాకులు చుప్పున వరుసగా మరణించడం మొదలైంది. ఎవరో కావాలనే విషం పెట్టడం వల్లే ఇవి చనిపోతున్నాయని స్థానికులు అనుమానం వ్యక్తం చేశారు.
పోస్టుమార్టం నివేదికలో ఏం తేలింది? చనిపోయిన కాకులకు నిర్వహించిన పోస్టుమార్టం పరీక్షల్లో కీలక విషయాలు వెలుగులోకి వచ్చాయి:
- నెఫ్రైటిస్ (Nephritis): కాకుల మూత్రపిండాలు వాపునకు గురయ్యాయి.
- స్ప్లీనోమెగలీ (Splenomegaly): కాకుల ప్లీహం సాధారణం కంటే ఎక్కువగా ఉబ్బిపోయింది.
వైద్య శాస్త్ర పరంగా ఇవి పక్షుల శరీరంలోకి విషపూరిత పదార్థాలు చేరాయనడానికి బలమైన ఆధారాలుగా పరిగణించబడుతున్నాయి.
తదుపరి చర్యలు: చెన్నై కార్పొరేషన్ ప్రధాన పశువైద్య అధికారి డాక్టర్ కమల్ హుస్సేన్ ఈ విషయంపై స్పందిస్తూ.. “ప్రాథమికంగా మద్రాస్ వెటర్నరీ కాలేజీలో నమూనాలను సేకరించాం. అనంతరం తమిళనాడు వెటర్నరీ అండ్ యానిమల్ సైన్సెస్ యూనివర్సిటీలో పోస్టుమార్టం నిర్వహించాం. కాకుల శరీరంలో నెఫ్రైటిస్, స్ప్లీనోమెగలీ లక్షణాలు ఉండటం వల్ల ఇవి విషం వల్లే చనిపోయాయని భావిస్తున్నాం. అయితే అది ఏ రకమైన విషం అనేది తెలుసుకోవడానికి నమూనాలను ఫార్మకాలజీ ల్యాబ్కు పంపాము” అని తెలిపారు.