వాషింగ్టన్: స్విట్జర్లాండ్‌లో జరుగుతున్న ప్రపంచ ఆర్థిక వేదిక (World Economic Forum) సదస్సుకు వెళ్తున్న అమెరికా అధ్యక్షుడు డొనాల్డ్ ట్రంప్ విమానం గాల్లోనే యూ-టర్న్ తీసుకుని తిరిగి అమెరికాకు చేరుకుంది.
స్విట్జర్లాండ్ వెళ్లాల్సిన విమానం అకస్మాత్తుగా వాషింగ్టన్‌కు తిరిగి రావడంతో కాసేపు గందరగోళం నెలకొంది. అయితే, విమానం వెనుదిరగడానికి గల కారణం కాసేపటి తర్వాత తెలిసింది.
స్విట్జర్లాండ్‌లోని దావోస్‌లో ప్రస్తుతం ప్రపంచ ఆర్థిక వేదిక సదస్సు జరుగుతోంది. దీనికి ప్రపంచవ్యాప్తంగా వివిధ దేశాల నేతలు తరలివస్తున్నారు. ఈ సదస్సులో పాల్గొనేందుకు ట్రంప్ కూడా తన అధికారిక విమానం ‘ఎయిర్ ఫోర్స్ వన్’లో బయలుదేరారు.
గాల్లోనే యూ-టర్న్
విమానం బయలుదేరిన కొద్దిసేపటికే అట్లాంటిక్ మహాసముద్రం మీదుగా ప్రయాణిస్తుండగా అకస్మాత్తుగా వెనుదిరిగి వాషింగ్టన్‌కు చేరుకుంది. ఈ విషయాన్ని అమెరికా విమానయాన అధికారులు ధృవీకరించారు. విమానం ఊహించని విధంగా తిరిగి రావడంతో, అధ్యక్షుడి భద్రతా బలగాలు (కన్వాయ్) హుటాహుటిన వాషింగ్టన్ సమీపంలోని ‘జాయింట్ బేస్ ఆండ్రూస్’ బేస్‌కు చేరుకున్నాయి. దీనికి సంబంధించిన వీడియోలు సోషల్ మీడియాలో వైరల్ అయ్యాయి.
కారణం ఏమిటి?
విమానం వెనుదిరగడానికి సాంకేతిక కారణమేనని అధికారులు స్పష్టం చేశారు. విమానంలో చిన్నపాటి విద్యుత్ లోపం (Electrical Glitch) తలెత్తినట్లు గుర్తించారు.
వైట్ హౌస్ సీనియర్ అధికారి ఒకరు దీనిపై స్పందిస్తూ.. “ఎయిర్ ఫోర్స్ వన్ బయలుదేరిన తర్వాత విమాన సిబ్బంది విద్యుత్ వ్యవస్థలో లోపాన్ని గమనించారు. ముందుజాగ్రత్త చర్యగా విమానాన్ని తిరిగి వాషింగ్టన్‌కు మళ్లించాము. అనంతరం అధ్యక్షుడు మరియు ఆయన బృందం వేరే విమానంలో స్విట్జర్లాండ్‌కు బయలుదేరి వెళ్లారు” అని తెలిపారు.
ఎందుకు ఇంత ఆందోళన?
ట్రంప్ సురక్షితంగానే ఉన్నప్పటికీ, విమానం వెనుదిరిగిన వార్త తెలియగానే అందరూ ఆందోళనకు గురయ్యారు. దీనికి ప్రధాన కారణం.. ఇటీవల ఇరాన్ రాజకీయ నాయకులు అమెరికా అధ్యక్షుడికి ప్రాణహాని తలపెట్టేలా వివాదాస్పద వ్యాఖ్యలు చేయడమే. ఇరాన్ హెచ్చరికల నేపథ్యంలో ఈ ఘటన జరగడంతో ట్రంప్ మద్దతుదారులు ఆందోళన చెందారు. అయితే, ఇది కేవలం సాంకేతిక లోపం మాత్రమేనని వివరణ ఇవ్వడంతో అంతా ఊపిరి పీల్చుకున్నారు.
మరోవైపు, ట్రంప్ ఐరోపా పర్యటన ప్రపంచవ్యాప్తంగా ఆసక్తిని రేపుతోంది. గ్రీన్‌లాండ్‌ను అమెరికా సొంతం చేసుకోవాలని ఆయన పట్టుబడుతున్న తరుణంలో, ఐరోపా నేతలతో ఆయన జరిపే చర్చలు ప్రాధాన్యత సంతరించుకున్నాయి.