గురుగ్రామ్ ఫ్లాట్‌లో రెండేళ్లుగా ‘వెట్టిచాకిరి’.. గిరిజన మహిళ బందీ! టెక్నీషియన్ ఫోన్ ద్వారా బయటపడ్డ దారుణం

గురుగ్రామ్: రోజుకు 16 గంటల పాటు బలవంతంగా పని చేయించడం, చిన్న చిన్న విషయాలకే విచక్షణా రహితంగా కొట్టడం, కనీసం కుటుంబ సభ్యులతో మాట్లాడటానికి కూడా వీల్లేకుండా చేయడం.. పశ్చిమ బెంగాల్‌లోని బీర్‌భూమ్ జిల్లాకు చెందిన ఒక 39 ఏళ్ల గిరిజన మహిళ గత రెండేళ్లుగా గురుగ్రామ్‌లోని సెక్టార్ 91 లో గల ఒక లగ్జరీ ఫ్లాట్‌లో అనుభవించిన నరకయాతన ఇది. సదరు ఇంటికి ఉన్న ‘స్మార్ట్ లాకింగ్ సిస్టమ్’ (డిజిటల్ లాక్) కారణంగా ఆమె ఇల్లు దాటి బయటకు రాలేకపోయింది. ఇటీవల ఆ ఇంటికి వచ్చిన ఒక సర్వీస్ టెక్నీషియన్ సహాయంతో ఆమె తన కుటుంబ సభ్యులను సంప్రదించడంతో ఈ ఘోరం వెలుగులోకి వచ్చింది.

పశ్చిమ బెంగాల్ పోలీస్, గురుగ్రామ్ పోలీస్, జిల్లా యంత్రాంగం మరియు స్వచ్ఛంద సంస్థలు సమన్వయంతో శనివారం జరిపిన సంయుక్త ఆపరేషన్‌లో ఆమెకు విముక్తి లభించింది.

చిత్రహింసల వల్ల వినికిడి, చేతి శక్తి కోల్పోయిన బాధితురాలు:
రక్షించబడిన అనంతరం బాధితురాలు తన యజమానులు పెట్టిన హింసల గురించి పోలీసుల వద్ద వాపోయింది. యజమాని నిరంతరం శారీరకంగా దాడి చేయడం వల్ల తన కుడి చేయి ఎత్తలేకపోతున్నానని, కుడి చెవి వినికిడి శక్తి కూడా కోల్పోయానని తెలిపింది. తనను రక్షించిన రోజు ఉదయం కూడా తల, ముఖంపై ఎంత దారుణంగా కొట్టారంటే, తాను చనిపోతానేమోనని భయపడ్డానని ఆమె రోదిస్తూ చెప్పింది.

పోలీసుల సమాచారం ప్రకారం.. సదరు యజమాని కుటుంబం ఆ మహిళను గృహ కార్మికురాలిగా (డొమెస్టిక్ హెల్ప్) ఉంచుకోవడానికి మధ్యవర్తులకు 40,000 రూపాయల అడ్వాన్స్ ఇచ్చి మొదట ఢిల్లీకి, ఆ తర్వాత గురుగ్రామ్‌కు తీసుకువచ్చారు. అయితే ఏ పరిస్థితుల్లో ఆమెను వారికి అప్పగించారనే కోణంలో దర్యాప్తు జరుగుతోంది.

ఇంటికి తాళం వేసి నరకం:
యజమానులు బయటకు వెళ్లేటప్పుడల్లా ఆమెను ఇంట్లోనే పెట్టి డిజిటల్ లాక్ వేసేవారు. ఈ ఏడాది మార్చిలోనే బాధితురాలి సోదరి సహాయం కోసం బీర్‌భూమ్ అధికారులను ఆశ్రయించింది. చిన్న విషయాలకే కాకుండా, ఇంటికి వెళ్తానని అడిగినప్పుడల్లా ఆమెపై రోజువారీగా తీవ్రమైన శారీరక దాడులు జరిగేవని సోదరి పేర్కొంది.

ఇటీవల ఇంటికి ఒక సర్వీస్ టెక్నీషియన్ వచ్చినప్పుడు, బాధితురాలు ఆ అవకాశాన్ని ఉపయోగించుకుంది. ఎలాగోలా అతడిని ఒప్పించి, అతని మొబైల్ ఫోన్ ద్వారా తన కుటుంబానికి కాల్ చేసింది. తన దయనీయ స్థితిని వివరించడంతో, అప్రమత్తమైన బంధువులు వెంటనే పోలీసులను ఆశ్రయించారు.

కేసు నమోదు – రెస్క్యూ ఆపరేషన్:
జూన్ 4న పశ్చిమ బెంగాల్‌లోని పోలీస్ స్టేషన్‌లో ఎఫ్‌ఐఆర్ (FIR) నమోదైంది. వెట్టిచాకిరి వ్యవస్థ (నిర్మూలన) చట్టం (Bonded Labour Act) మరియు భారతీయ న్యాయ సంహిత (BNS) లోని సెక్షన్ 127(4) (బలవంతపు చాకిరి మరియు దోపిడీ) కింద కేసులు నమోదు చేశారు. బాధితురాలి సోదరితో కలిసి పశ్చిమ బెంగాల్ పోలీస్ ప్రత్యేక బృందం గురుగ్రామ్ చేరుకుని, స్థానిక పోలీసుల సహాయంతో ఫ్లాట్‌పై దాడి చేసి ఆమెను రక్షించారు.

సెక్టార్ 93 పోలీస్ అవుట్‌పోస్ట్ అసిస్టెంట్ సబ్-ఇన్‌స్పెక్టర్ రాజేష్ ఖోవాల్ స్పందిస్తూ.. పోలీసులు దాడి చేసిన సమయంలో నిందితుడైన యజమాని కుటుంబం ఇంట్లో లేరని తెలిపారు.

ముక్కలుగా నరికేస్తామని బెదిరింపులు:
ప్రస్తుతం దర్యాప్తు ప్రాథమిక దశలో ఉందని, నిందితుల ఇంటి బయట నోటీసులు అంటించామని పోలీసులు తెలిపారు. ప్రాథమిక విచారణలో, సదరు కుటుంబం మహిళను చాలా క్రూరంగా చూసినట్లు తేలింది. ఒకవేళ ఆమె బాల్కనీ నుండి ఎవరినైనా సహాయం కోసం అరిచి పిలిచినా.. ఆమెను చంపేస్తామని, ముక్కలు ముక్కలుగా నరికేస్తామని యజమాని బెదిరించేవాడని వెల్లడైంది. ప్రస్తుతం ఆ మహిళ తీవ్ర మానసిక ఆందోళనలో (Traumatised) ఉందని పోలీసులు పేర్కొన్నారు.