సాధారణంగా పెళ్లి అంటే గుర్రం మీద పెళ్లికొడుకు రావడం.. వేడుక ముగిశాక పెళ్లికూతురు కన్నీళ్లతో పుట్టిల్లు వదిలి వెళ్లడం చూస్తుంటాం. కానీ ఛత్తీస్గఢ్లోని సుల్పాగా గ్రామంలో సీన్ పూర్తిగా రివర్స్ అయ్యింది! ఇక్కడ వధువే బ్యాండ్ బాజాలతో వరుడి ఇంటికి బారాత్ తీసుకొచ్చింది. పెళ్లి తర్వాత వరుడు వెక్కివెక్కి ఏడుస్తూ తన అత్తారింటికి (వధువు ఇంటికి) పయనమయ్యాడు. సంప్రదాయాలను తలకిందలు చేసిన ఈ ‘అపూర్వ’ వివాహం ఇప్పుడు దేశవ్యాప్తంగా చర్చనీయాంశమైంది.
అల్లుడు వద్దు.. కొడుకు కావాలి: ఒక తండ్రి సంకల్పం
ఈ కథానాయిక దేముని ఎక్కా తండ్రి మోహన్ ఎక్కా ఒక సామాన్య రైతు. ఆయనకు నలుగురు కుమార్తెలు కానీ కొడుకులు లేరు. “నా తర్వాత నా బిడ్డల పరిస్థితి ఏమిటి? నా వ్యవసాయాన్ని ఎవరు చూసుకుంటారు?” అన్న ఆందోళన ఆయనను వెంటాడింది. అప్పుడే ఆయన ఒక సాహసోపేతమైన నిర్ణయం తీసుకున్నారు. తన ఇంటికి వచ్చే అల్లుడిని ‘అల్లుడిలా’ కాకుండా ‘కొడుకులా’ ఆహ్వానించాలని నిశ్చయించుకున్నారు. వరుడు బిలాసస్ బర్వా కుటుంబం కూడా ఇందుకు గ్రీన్ సిగ్నల్ ఇవ్వడంతో ఈ వినూత్న వివాహానికి తెరలేచింది.
కన్యాదానం కాదు.. ఇది ‘వరదానం’!
ఈ పెళ్లిలో అత్యంత అరుదైన ఘట్టం ‘వరదానం’. సాధారణంగా తండ్రి తన కూతురిని దానం చేస్తాడు (కన్యాదానం). కానీ ఇక్కడ వరుడి తల్లిదండ్రులు తమ కుమారుడిని వధువు కుటుంబానికి దానంగా ఇచ్చారు. దీన్నే ‘వరదానం’ అని పిలిచారు. వేడుక ముగిసి బిలాసస్ తన ఇంటిని వదిలి భార్య ఇంటికి వెళ్లే సమయంలో, పుట్టిల్లు వదిలి వెళ్లేటప్పుడు ఆడపిల్లలు పడే వేదన ఆయన కళ్లలో కనిపించింది. వరుడు కన్నీరు పెట్టుకోవడం చూసి గ్రామస్థులంతా భావోద్వేగానికి లోనయ్యారు.
వరకట్నం లేదు.. ఆడంబరం లేదు!
ఈ పెళ్లిలో మరో గొప్ప విషయం ఏమిటంటే.. ఎక్కడా వరకట్నం ఊసే లేదు. వధువు తరపు వారే ఊరేగింపుగా వరుడి ఇంటికి వెళ్లారు. “ఒక అమ్మాయి బారాత్ తీసుకురావడం మా జీవితంలో ఇదే మొదటిసారి చూడటం” అని అతిథులు ఆశ్చర్యపోయారు. వరుడి కుటుంబం కూడా ఈ మార్పును మనస్ఫూర్తిగా స్వాగతించింది.
సమాజానికి కొత్త దిక్సూచి
“కొడుకులు లేని తల్లిదండ్రులకు ఈ పెళ్లి ఒక పెద్ద భరోసా. ఆడపిల్లలు కూడా కొడుకుల్లాగే తల్లిదండ్రులను వృద్ధాప్యంలో చూసుకోగలరని ఈ ఘటన నిరూపించింది” అని స్థానికులు పేర్కొన్నారు. కేవలం ప్రేమ, సమానత్వం ఉంటే ఏ సంప్రదాయాన్నైనా మార్చుకోవచ్చని సుల్పాగా గ్రామస్తులు చాటిచెప్పారు. నేడు ఆ రైతు మోహన్ ఎక్కాకు అల్లుడు దొరకలేదు.. తన వ్యవసాయాన్ని, కుటుంబాన్ని కాపాడే ఒక ‘కొడుకు’ దొరికాడు.