గూగుల్ ఖాతా పాస్వర్డ్ను మరిచిపోయి, దాన్ని తిరిగి పొందలేక ఇబ్బంది పడేవారికి పరిష్కారంగా ‘సెల్ఫీ వీడియో’ అనే కొత్త సెక్యూరిటీ ఫీచర్ను గూగుల్ సంస్థ పరిచయం చేసింది.
గూగుల్ ఖాతాలు లాక్ అయినా లేదా సాధారణ ఫోన్ నంబర్, రికవరీ ఇమెయిల్ వంటివి అందుబాటులో లేని సమయంలో ఈ ఫీచర్ వినియోగదారులకు ఎంతో సహాయకరంగా ఉంటుంది.
ఈ సౌకర్యాన్ని ఉపయోగించాలనుకునేవారు తమ గూగుల్ ఖాతా సెట్టింగ్స్లోకి వెళ్లి ముందస్తుగానే ఒక చిన్న సెల్ఫీ వీడియోను రికార్డ్ చేసి సేవ్ చేయాలి. ఆ సమయంలో, గూగుల్ మార్గదర్శకాల ప్రకారం తలను వేర్వేరు కోణాల్లో తిప్పుతూ ముఖాన్ని రికార్డ్ చేయాల్సి ఉంటుంది. దీని ద్వారా వినియోగదారుని ముఖం ఖచ్చితంగా సిస్టమ్లో అప్లోడ్ చేయబడి రెఫరెన్స్ వీడియోగా నిల్వ చేయబడుతుంది.
భవిష్యత్తులో పాస్వర్డ్ను మరిచిపోయినా లేదా ఖాతాను తెరవలేని పరిస్థితి ఎదురైనా, వినియోగదారు మళ్లీ ఒక కొత్త సెల్ఫీ వీడియోను తీయాల్సి ఉంటుంది. సిస్టమ్ కొత్త వీడియోను, ఇప్పటికే సేవ్ చేసిన వీడియోను పోల్చి చూసి, ఖాతాదారుడు ఒకరేనని ధృవీకరించిన తర్వాత ఖాతాను తెరవడానికి అనుమతిస్తుంది.
ఫోటోలు లేదా AI ద్వారా తయారు చేసిన నకిలీ వీడియోలను ఉపయోగించి ఖాతాను దుర్వినియోగం చేయకుండా నిరోధించడానికే ఈ లైవ్ హెడ్ మూవ్మెంట్ టెస్ట్లను తప్పనిసరి చేశారు. వినియోగదారుల వ్యక్తిగత డేటా భద్రతకు గూగుల్ పూర్తి హామీ ఇచ్చింది.
ఈ సెల్ఫీ వీడియోలు గూగుల్ సర్వర్లలో ఎన్క్రిప్ట్ చేయబడి అత్యంత సురక్షితంగా ఉంచబడతాయని, వినియోగదారుడు కోరుకుంటే ఏ సమయంలోనైనా వీటిని తొలగించుకోవచ్చని ప్రకటించారు. ఈ కొత్త ఫీచర్ అర్హులైన వినియోగదారులందరికీ దశలవారీగా అందుబాటులోకి రావడం ప్రారంభమైంది.