కోయంబత్తూరు (కోవై) ప్రాంతానికి చెందిన 30 ఏళ్ల యువకుడు అక్కడ ఒక ప్రముఖ ఐటీ (IT) కంపెనీలో ఉద్యోగం చేస్తున్నాడు. ఇతను స్వలింగ సంపర్కులు ఉపయోగించే ‘గ్రిండర్’ (Grinder) అనే డేటింగ్ యాప్ను వాడుతుండేవాడు.
ఈ క్రమంలో సదరు యాప్ ద్వారా ఒక యువకుడితో అతనికి పరిచయం ఏర్పడింది. ఆ పరిచయంతో వారిద్దరూ నేరుగా కలవాలని ప్లాన్ చేసుకున్నారు. అందుకని ఆ యువకుడు, ఐటీ ఉద్యోగిని ఒక నిర్దిష్ట ఇంటికి రావాల్సిందిగా ఆహ్వానించాడు.
అతని మాటలను నిజమని నమ్మి ఐటీ ఉద్యోగి చెప్పిన చోటుకు వెళ్లాడు. అయితే, ఆ ఇంటి లోపలికి వెళ్లగానే అక్కడ అప్పటికే మరికొందరు గ్యాంగ్ సభ్యులు నక్కి ఉండటం చూసి అతను షాక్కు గురయ్యాడు. వారంతా కలిసి ఐటీ ఉద్యోగిని చుట్టుముట్టి, బెదిరించి డబ్బులు డిమాండ్ చేశారు. అందుకు ఆయన నిరాకరించడంతో, ఆగ్రహం వ్యక్తం చేసిన ఆ ముఠా అతనిపై విచక్షణారహితంగా దాడి చేసింది. ఆపై అతని మొబైల్ ఫోన్ను లాక్కుని, ‘జీపే’ (Google Pay) ఆన్లైన్ ట్రాన్సాక్షన్ ద్వారా బలవంతంగా ₹1,400 మొత్తాన్ని తమ అకౌంట్కు బదిలీ చేసుకున్నారు.
అంతటితో ఆగకుండా, మరో ₹20 వేల నగదు తీసుకురావాలంటూ అతనికి నరకం చూపిస్తూ తీవ్రంగా బెదిరించి పంపించి వేశారు. ఈ దారుణ ఘటనపై బాధితుడైన ఐటీ ఉద్యోగి కునియముత్తూరు పోలీస్ స్టేషన్లో ఫిర్యాదు చేశాడు. బాధితుడి ఫిర్యాదు మేరకు కేసు నమోదు చేసిన పోలీసులు రంగంలోకి దిగి ముమ్మర దర్యాప్తు చేపట్టారు. డేటింగ్ యాప్ ఆధారంగా ఐటీ ఉద్యోగిని ట్రాప్ చేసి, దాడి చేసి డబ్బులు వసూలు చేసిన వారు తెన్కాసి జిల్లాకు చెందిన విష్ణు (19), కపిల్ మాదేశ్వరన్ (19) మరియు కార్తికేయన్, కదిరవన్లుగా పోలీసులు గుర్తించారు. వీరిలో విష్ణు, కపిల్ మాదేశ్వరన్ అనే ఇద్దరు నిందితులను పోలీసులు అరెస్ట్ చేయగా, పరారీలో ఉన్న మిగిలిన ఇద్దరు నిందితుల కోసం పోలీసులు గాలిస్తున్నారు.
Leave a Reply