నటుడు గోవింద భార్య సునీతా అహుజా ఇటీవల తన వైవాహిక జీవితంపై కొన్ని ఆసక్తికర విషయాలను పంచుకున్నారు. గోవింద ఒక కొడుకుగా, తండ్రిగా అద్భుతమని.. కానీ భర్తగా మాత్రం తను కోరుకున్నట్లు ఉండలేకపోయారని ఆమె పేర్కొన్నారు.
గత కొంతకాలంగా గోవింద, సునీతా అహుజా వార్తల్లో నిలుస్తున్నారు. ముఖ్యంగా వివాహేతర సంబంధాల గురించి సునీత చేసిన వ్యాఖ్యల తర్వాత గోవింద పలు వివరణలు ఇచ్చుకోవాల్సి వచ్చింది. తాజాగా ఒక ఇంటర్వ్యూలో సునీత మరోసారి స్పందిస్తూ.. గోవింద ఒక కొడుకుగా, తండ్రిగా తన బాధ్యతలను చక్కగా నిర్వహించారని, అయితే భర్తగా మాత్రం కొన్ని విషయాల్లో వెనుకబడ్డారని అన్నారు.
గోవిందకు ఉన్న ఫ్యాన్ ఫాలోయింగ్ మరియు మహిళా అభిమానుల గురించి మీకు ఎప్పుడైనా అసూయ కలిగిందా అని అడిగినప్పుడు సునీత ఇలా స్పందించారు: “మనకు భర్తపై నమ్మకం ఉన్నప్పుడు.. 90వ దశకంలో హీరోలకు అఫైర్స్ ఉన్నాయని వినడం సాధారణ విషయంగా ఉండేది. నేను అప్పటి మాట చెబుతున్నాను, ఇప్పటి గురించి కాదు.”
“సోషల్ మీడియాలో గాసిప్స్ చేసేవాళ్లు ఎప్పుడూ ఏదో ఒకటి వాగుతూనే ఉంటారు. వాటిపై మనం దృష్టి పెట్టకూడదు, మన ఇంట్లో ఏం జరుగుతుందో చూసుకోవాలి. గోవింద తల్లి బతికున్నంత కాలం ఆయన చాలా మంచి కొడుకుగా ఉన్నారు. ఆమె తర్వాత కూడా ఆయన మంచిగానే ఉన్నారు” అని సునీత తెలిపారు.
అభిషేక్ వ్యాస్ ఇన్సైట్స్కు ఇచ్చిన ఇంటర్వ్యూలో సునీత తన వివాహం గురించి మాట్లాడుతూ.. “నేను మళ్లీ చెబుతున్నాను, గోవింద ఒక మంచి కొడుకు, మంచి సోదరుడు. కానీ ఒక భర్త నుండి నేను ఏం కోరుకుంటానంటే.. నాకు పార్టీలకు వెళ్లడం, డిన్నర్లకు వెళ్లడం, హాలిడేస్ ఎంజాయ్ చేయడం ఇష్టం. కానీ ఆయన తన కుటుంబాన్ని పోషించడంలో ఎంతగా నిమగ్నమైపోయారంటే.. జీవితాన్ని అస్సలు ఆస్వాదించలేదు. ఆయన వయస్సు 60 ఏళ్లు, కానీ తన కోసం తాను ఎప్పుడూ బతకలేదు” అని ఆవేదన వ్యక్తం చేశారు.
సునీత ఇంకా మాట్లాడుతూ.. “ఇది నాకు బాధ కలిగిస్తుంది. మీరు అంత పెద్ద సూపర్ స్టార్ అయ్యి కూడా జీవితంలో ఏం చూశారు? ఏమీ లేదు. అందుకే నేను ఎప్పుడూ చెబుతుంటాను.. నాకు గోవింద లాంటి కొడుకు కావాలి కానీ భర్త వద్దు అని. ఇప్పుడు బాధపడినా ప్రయోజనం లేదు, ఆయనను వదిలి వెళ్లలేను. మా పెళ్లయ్యి 40 ఏళ్లు అవుతోంది, ఇప్పుడు అలా ఆలోచించడం కూడా నేరమే అవుతుంది” అని చెప్పుకొచ్చారు.
గోవింద మరియు సునీతా అహుజా మార్చి 11, 1987న వివాహం చేసుకున్నారు. వీరికి టీనా అహుజా మరియు యశవర్ధన్ అహుజా అనే ఇద్దరు పిల్లలు ఉన్నారు.