మన దైనందిన జీవితంలో వంట గ్యాస్ సిలిండర్‌పై మనం ఎంతలా ఆధారపడతామో.. అది అకస్మాత్తుగా అయిపోయినప్పుడే అర్థమవుతుంది. ముఖ్యంగా వంట చేస్తున్నప్పుడు గ్యాస్ ఆగిపోయి, ఇంట్లో రెండో సిలిండర్ అందుబాటులో లేనప్పుడు పరిస్థితి మరీ ఇబ్బందిగా మారుతుంది.
అలాంటప్పుడు, “సిలిండర్‌లో ఎంత గ్యాస్ ఉందో ముందే తెలిసి ఉంటే బాగుండు” అని చాలామంది అనుకుంటారు. కొందరు సిలిండర్‌ను ఎత్తి చూడటం లేదా ఊపి చూడటం ద్వారా గ్యాస్ ఎంతుందో అంచనా వేస్తారు, కానీ దీనివల్ల కచ్చితమైన వివరాలు తెలియవు. అయితే, సిలిండర్‌లో గ్యాస్ ఎంత మిగిలి ఉందో తెలుసుకోవడానికి ఒక సులభమైన మార్గం ఉంది. ఈ వైరల్ హ్యాక్ ద్వారా నిమిషాల్లోనే మీ సిలిండర్ నిండుగా ఉందో లేక ఖాళీ కావస్తుందో తెలుసుకోవచ్చు.
సిలిండర్‌లో గ్యాస్ ఎంతుందో ఈ చిట్కాతో తెలుసుకోండి:
సిలిండర్ బరువును బట్టి అంచనా వేయడం కంటే, ఇన్‌స్టాగ్రామ్‌లో దీప్తి కపూర్ షేర్ చేసిన ఈ చిట్కా మరింత ఖచ్చితంగా పని చేస్తుంది. దీని కోసం మీకు ఎటువంటి పరికరాలు అవసరం లేదు, కేవలం కొంచెం వేడి నీళ్లు ఉంటే చాలు. అది ఎలాగో స్టెప్ బై స్టెప్ ఇక్కడ చూడండి:
- వేడి నీటిని సిద్ధం చేసుకోండి: మొదట ఒక జగ్గులో వేడి నీటిని తీసుకోండి. నీరు మరీ మరిగిపోనవసరం లేదు, కానీ సిలిండర్ ఉపరితలంపై ఆ వేడి తెలిసేలా ఉంటే చాలు.
- నీటిని పోయండి: ఇప్పుడు ఆ వేడి నీటిని సిలిండర్ పైభాగం నుండి కింది వరకు ఒక వైపున పోయండి. సిలిండర్ ఒక వైపు పూర్తిగా తడిసేలా చూడండి.
- 10 సెకన్లు ఆగండి: నీరు పోసిన తర్వాత ఒక 5 నుండి 10 సెకన్ల పాటు వేచి ఉండండి.
- తాకి చూడండి: ఇప్పుడు సిలిండర్ ఉపరితలాన్ని చేత్తో తాకి చూడండి.
- వేడిగా ఉన్న భాగం: సిలిండర్ ఏ భాగం అయితే వేడిగా అనిపిస్తుందో, అక్కడ గ్యాస్ లేదని అర్థం. అంటే ఆ భాగం ఖాళీగా ఉంది.
- చల్లగా ఉన్న భాగం: సిలిండర్ ఏ భాగం అయితే చల్లగా తగులుతుందో, అక్కడ LPG గ్యాస్ ఉందని అర్థం.
లిక్విడ్ గ్యాస్ ఉన్న భాగం నీటి వేడిని త్వరగా గ్రహించి చల్లగా మారుతుంది, ఖాళీగా ఉన్న భాగం వేడిగానే ఉంటుంది. ఈ చిన్న ట్రిక్‌తో మీ సిలిండర్ ఇంకా ఎన్ని రోజులు వస్తుందో మీరు సులభంగా అంచనా వేయవచ్చు.
ఈ చిట్కా పాటించేటప్పుడు తీసుకోవాల్సిన జాగ్రత్తలు:
- నీరు మరీ ఎక్కువగా మరిగిపోకూడదు, లేదంటే సిలిండర్‌ను తాకేటప్పుడు మీ చేయి కాలే ప్రమాదం ఉంది.
- నీరు పోసేటప్పుడు గ్యాస్ స్టవ్ ఆపి ఉంచాలి మరియు చుట్టుపక్కల ఎటువంటి మంటలు లేకుండా చూసుకోవాలి.