మీరు ఇల్లు మారుతున్నారా? గ్యాస్ కనెక్షన్ బదిలీ చేసుకోవడం పెద్ద తలనొప్పి అని ఆందోళన చెందుతున్నారా? అయితే మీకు ఒక గుడ్ న్యూస్. గతంలో లాగా గ్యాస్ ఏజెన్సీల ముందు గంటల తరబడి క్యూలో నిలబడాల్సిన అవసరం లేదు. కేవలం ఒకే ఒక్క క్లిక్తో మీ గ్యాస్ కనెక్షన్ను కొత్త అడ్రస్కు మార్చుకునే డిజిటల్ సౌకర్యం అందుబాటులోకి వచ్చింది. ఇండియన్ ఆయిల్ (Indane), భారత్ గ్యాస్, హెచ్పి గ్యాస్ కంపెనీలు తమ వినియోగదారుల కోసం ఈ ప్రక్రియను అత్యంత సులభతరం చేశాయి.
ఆన్లైన్లో బదిలీ ప్రక్రియ ఇలా..
మీరు ఒకే నగరంలో ఇల్లు మారినా లేదా వేరే జిల్లాకు వెళ్తున్నా, ఆన్లైన్ ద్వారానే దరఖాస్తు చేసుకోవచ్చు.
- ముందుగా మీ గ్యాస్ కంపెనీ అధికారిక వెబ్సైట్ లేదా యాప్లోకి లాగిన్ అవ్వండి.
- ‘ట్రాన్స్ఫర్’ (Transfer) ఆప్షన్ను ఎంచుకుని, మీరు వెళ్లే కొత్త ప్రాంతం యొక్క పిన్ కోడ్ (Pincode) ఎంటర్ చేయండి.
- అక్కడ అందుబాటులో ఉన్న డిస్ట్రిబ్యూటర్లలో మీకు నచ్చిన వారిని ఎంచుకుని దరఖాస్తును సమర్పించవచ్చు.
మీ దగ్గర రెండు సిలిండర్లు ఉన్నాయా? అయితే ఇది చదవండి!
రెండు సిలిండర్లు (Double Bottle Connection) ఉన్నవారు కొన్ని నిబంధనలు పాటించాల్సి ఉంటుంది:
- ఒకే నగరంలో ఇల్లు మారితే: మీరు మీ దగ్గర ఉన్న సిలిండర్లు మరియు రెగ్యులేటర్ను ఏజెన్సీకి అప్పగించాల్సిన అవసరం లేదు. వాటిని మీరే కొత్త ఇంటికి తీసుకెళ్లవచ్చు. ఆన్లైన్లో అడ్రస్ మార్చిన తర్వాత, కొత్త డిస్ట్రిబ్యూటర్ వద్దకు వెళ్లి మీ గ్యాస్ బుక్ చూపిస్తే సరిపోతుంది.
- వేరే ఊరికి లేదా జిల్లాకు మారితే: మీ దగ్గర ఉన్న రెండు సిలిండర్లు, రెగ్యులేటర్ను పాత డిస్ట్రిబ్యూటర్కు అప్పగించి ‘టెర్మినేషన్ వోచర్’ (Termination Voucher) తీసుకోవాలి. కొత్త ఊరికి వెళ్ళాక ఆ వోచర్ చూపిస్తే, అక్కడ మీకు మళ్ళీ రెండు కొత్త సిలిండర్లు కేటాయిస్తారు.
కావాల్సిన పత్రాలు ఇవే..
బదిలీ సమయంలో మీ వద్ద ఆధార్ కార్డు, గ్యాస్ బుక్, మరియు కొత్త ఇంటి అడ్రస్ ప్రూఫ్ (రెంటల్ అగ్రిమెంట్ లేదా కరెంట్ బిల్లు) సిద్ధంగా ఉంచుకోవాలి.
ముఖ్య గమనిక: రెండు సిలిండర్లు ఉన్నవారు పాత డిపాజిట్ రశీదును భద్రంగా ఉంచుకోవాలి. దీనివల్ల కొత్త చోట మళ్ళీ డిపాజిట్ కట్టాల్సిన అవసరం ఉండదు. అలాగే మీ మొబైల్ నంబర్, బ్యాంక్ ఖాతా వివరాలు సరిగ్గా ఉంటేనే గ్యాస్ సబ్సిడీ సక్రమంగా అందుతుంది.
డిజిటల్ సేవలను ఉపయోగించుకోవడం ద్వారా సమయం ఆదా అవ్వడమే కాకుండా, పారదర్శకమైన సేవలను పొందవచ్చని నిపుణులు సూచిస్తున్నారు.