ముంబై డెస్క్: ముంబై మహానగరంలో పొద్దున్నే టీతో పాటు ‘పావ్’ లేనిదే పొద్దు గడవదు. కానీ ఇప్పుడు ఆ పావ్ దొరకడమే కష్టంగా మారింది. కొనసాగుతున్న ఎల్‌పీజీ (LPG) సంక్షోభం ముంబై బేకరీ పరిశ్రమను కోలుకోలేని దెబ్బ తీస్తోంది. గ్యాస్ సిలిండర్లు దొరక్క బేకరీలు మూతపడుతున్నాయి, మరికొన్ని ఉత్పత్తిని సగానికి తగ్గించేశాయి. చట్టవిరుద్ధమని తెలిసినా ఆకలి తీర్చడానికి మళ్ళీ పాత పద్ధతుల్లో పొయ్యిలు వెలిగించే దుస్థితికి బేకర్లు చేరుకున్నారు.
వారం రోజులే గడువు.. లేదంటే తాళాలే!
ఆదివారం సాయంత్రం బాంబే బేకర్స్ అసోసియేషన్ నిర్వహించిన విలేకరుల సమావేశంలో పరిస్థితి తీవ్రతను వివరించారు. “మరో వారం రోజులు ఇలాగే గ్యాస్ కొరత కొనసాగితే, మా ముందున్న ఒకే ఒక్క దారి బేకరీలకు తాళం వేయడమే” అని అసోసియేషన్ ప్రెసిడెంట్ నజీర్ అన్సారీ ఆవేదన వ్యక్తం చేశారు.
ముంబై, థానే మరియు ముంబ్రా ప్రాంతాల్లోని సుమారు 650 బేకరీలకు ప్రాతినిధ్యం వహిస్తున్న ఈ సంస్థ, ఇప్పుడు తీవ్ర ఇబ్బందుల్లో ఉంది. “మేము సిలిండర్ల కోసం శతవిధాలా ప్రయత్నిస్తున్నాం, కానీ ఎక్కడా దొరకడం లేదు. ప్రస్తుతానికి గ్యాస్ ఉన్న వారి వద్దకు వెళ్లి మా వస్తువులను తయారు చేయించుకుంటున్నాం. కానీ ఇది ఎన్ని రోజులు సాధ్యం?” అని ఆయన ప్రశ్నించారు.
కోర్టు తీర్పు ఒకవైపు.. కొరత మరోవైపు!
ముంబై బేకరీలకు వచ్చిన అసలు కష్టం ఇక్కడే ఉంది. దశాబ్దాలుగా ఇవి కట్టెలు లేదా బొగ్గు పొయ్యిల (Oven) మీద నడిచేవి. అయితే, కాలుష్య నివారణలో భాగంగా గతేడాది హైకోర్టు ఆదేశాల మేరకు బేకర్లందరూ గ్యాస్ కనెక్షన్లకు మారారు. విద్యుత్ ఓవెన్లు వాడటం చాలా ఖర్చుతో కూడుకున్న పని కావడంతో, గ్యాస్ ఒక్కటే వారికి మార్గంగా కనిపించింది. తీరా అందరూ గ్యాస్‌కు మారిన తర్వాత, ఇప్పుడు కమర్షియల్ సిలిండర్లు మచ్చుకైనా కనిపించకపోవడం గమనార్హం.