గ్రీన్‌లాండ్‌ను అమెరికా ఎత్తుకుపోనుందా..? డెన్మార్క్‌తో ట్రంప్ డీల్..! “దేశం మీ దగ్గరే ఉంచుకోండి. భద్రత మాత్రం మాదే” అసలు గ్రీన్‌లాండ్ చుట్టూ ఏం జరుగుతోంది..?

గ్రీన్‌లాండ్‌కు సంబంధించి అమెరికా, డెన్మార్క్ మరియు గ్రీన్‌లాండ్ మధ్య కొత్త భద్రతా ఒప్పందం కుదిరినట్లు అమెరికా అధ్యక్షుడు డొనాల్డ్ ట్రంప్ ప్రకటించారు.

ఈ ఒప్పందం ద్వారా గ్రీన్‌లాండ్‌లో అమెరికా సైనిక ఉనికిని మరింత పెంచుకోనుందని తెలిపారు. అదే సమయంలో, గ్రీన్‌లాండ్ సార్వభౌమాధికారం డెన్మార్క్ వద్దే కొనసాగుతుందని స్పష్టం చేశారు. వచ్చే వారం జరగనున్న ఐక్యరాజ్యసమితి సాధారణ సభ (UN General Assembly) సమావేశంలో ఈ ఒప్పందంపై సంతకాలు జరిగే అవకాశం ఉంది.

గ్రీన్‌లాండ్ భద్రతకు సంబంధించిన కీలక వ్యవహారాల్లో అమెరికాకు ఎక్కువ భాగస్వామ్యం దక్కేలా ఈ ఒప్పందం కుదిరిందని ట్రంప్ తెలిపారు. గ్రీన్‌లాండ్‌లో అమెరికా సైనిక కార్యకలాపాలను తక్షణమే పెంచేందుకు చర్యలు తీసుకుంటామని ఆయన చెప్పారు. గతంలో గ్రీన్‌లాండ్‌ను అమెరికాకు అమ్మేయాలని ట్రంప్ పదేపదే డిమాండ్ చేయగా, డెన్మార్క్, గ్రీన్‌లాండ్ వర్గాలు దానిని తీవ్రంగా వ్యతిరేకించిన విషయం తెలిసిందే.

ఈ కొత్త ఒప్పందం ద్వారా గ్రీన్‌లాండ్‌లో నాటో (NATO) కూటమిలో సభ్యత్వం లేని దేశాల సైనిక స్థావరాలపై ఆంక్షలు విధించనున్నట్లు తెలుస్తోంది. ముఖ్యంగా రష్యా, చైనా వంటి దేశాలు గ్రీన్‌లాండ్‌లో సైనిక స్థావరాలను ఏర్పాటు చేయకుండా నిరోధించడానికి, ఆయా దేశాల పెట్టుబడులను నియంత్రించేలా కఠిన చర్యలు ఉంటాయని అమెరికా అధికారులు తెలిపారు. అమెరికా భద్రతకు గ్రీన్‌లాండ్ అత్యంత కీలకమైన ప్రాంతమని ట్రంప్ చాలా కాలంగా చెబుతూ వస్తున్నారు.

అమెరికా ఇప్పటికే గ్రీన్‌లాండ్ వాయువ్య ప్రాంతంలో పిటుఫిక్ (Pituffik) అంతరిక్ష కేంద్రాన్ని నిర్వహిస్తోంది. క్షిపణి దాడుల హెచ్చరికలు, క్షిపణి రక్షణ, అంతరిక్ష నిఘా వంటి పనుల కోసం ఈ స్థావరాన్ని ఉపయోగిస్తున్నారు. కాగా, ఈ కొత్త ఒప్పందం అధికారికంగా అమల్లోకి రావాలంటే డెన్మార్క్, గ్రీన్‌లాండ్ పార్లమెంట్ల ఆమోదం తప్పనిసరి. ఒప్పందం ప్రకటించిన నేపథ్యంలో, తదుపరి దశలో పార్లమెంటు ఆమోదం కోసం చర్యలు చేపట్టనున్నారు.