చెన్నై: నగరంలో గొనె సంచిలో ఒక యువకుడి శవం లభ్యమైన కేసులో విస్తుపోయే నిజాలు వెలుగులోకి వచ్చాయి. ఆ యువకుడితో పాటు అతని భార్యను, రెండేళ్ల కొడుకును కూడా దుండగులు హత్య చేసి వేర్వేరు ప్రాంతాల్లో పడేశారు. ఈ కేసులో బీహార్‌కు చెందిన ఐదుగురు నిందితులను పోలీసులు అరెస్ట్ చేశారు.
అసలేం జరిగింది?
జనవరి 26న అడయార్‌లోని ఇందిరా నగర్ ఫస్ట్ అవెన్యూ రోడ్డులో ఒక గొనె సంచి కనిపించింది. అందులో తీవ్రమైన గాయాలతో ఓ యువకుడి శవం ఉండటాన్ని గమనించిన పోలీసులు దర్యాప్తు ప్రారంభించారు. సీసీటీవీ దృశ్యాలను పరిశీలించగా, ఇద్దరు యువకులు బైక్‌పై వచ్చి ఆ సంచిని అక్కడ పడేసి వెళ్లినట్లు తేలింది.
విచారణలో మృతుడిని బీహార్‌కు చెందిన గౌరవ్ కుమార్ (24) గా గుర్తించారు. నిందితులు సికిందర్ (33), నరేంద్ర కుమార్ (45), రవీంద్రనాథ్ ఠాగూర్ (45), వికాస్ (24) సహా ఐదుగురిని పోలీసులు అదుపులోకి తీసుకున్నారు.
నిందితుల ఒళ్లు గగుర్పొడిచే వాంగ్మూలం:
నిందితులు ఇచ్చిన వాంగ్మూలం ప్రకారం, వారు కేవలం గౌరవ్‌ను మాత్రమే కాకుండా అతని భార్య మునితా కుమారి (22), రెండేళ్ల కుమారుడు బిర్మాని కుమార్ ను కూడా హత్య చేశారు.
- బాబు మృతదేహాన్ని సెంట్రల్ కైలాష్ రైల్వే బ్రిడ్జి కింద ఉన్న బకింగ్‌హామ్ కాలువలో పడేశారు.
- మునితా కుమారి మృతదేహాన్ని పెరుంగుడి చెత్త యార్డ్‌లో విసిరేశారు. పోలీసుల గాలింపులో బాబు మృతదేహం లభించగా, మునితా మృతదేహం కోసం జేసీబీలతో చెత్త యార్డ్‌లో గాలిస్తున్నారు.
హత్య వెనుక ఉన్న కారణం:
గౌరవ్ కుమార్ గతంలో శ్రీపెరంబుదూర్‌లోని ఓ కంపెనీలో సెక్యూరిటీ గార్డుగా పనిచేసేవాడు. ఉద్యోగం పోవడంతో బీహార్ వెళ్ళిపోయాడు. మళ్లీ ఉద్యోగం కోసం చెన్నైలోని తన స్నేహితుడు కృష్ణ ప్రసాద్‌ను సంప్రదించాడు. కృష్ణ ప్రసాద్ ద్వారా తరమణి పాలిటెక్నిక్‌లో సెక్యూరిటీగా పనిచేస్తున్న సికిందర్ పరిచయమయ్యాడు.
ఉద్యోగం ఇప్పిస్తానని నమ్మించడంతో గౌరవ్ తన భార్య, బిడ్డతో కలిసి జనవరి 21న చెన్నై వచ్చాడు. సికిందర్ వారిని తరమణి వెనుక ఉన్న ఒక ప్రైవేట్ భవనంలో ఉంచాడు.
ఘటన రోజు: సికిందర్ తన స్నేహితులతో కలిసి మద్యం సేవించాడు. ఆ సమయంలో మునితా కుమారిపై వారు లైంగిక దాడికి ప్రయత్నించారు. దీనిని గౌరవ్ అడ్డుకోవడంతో ఆగ్రహించిన నిందితులు ఇనుప రాడ్లతో గౌరవ్‌ను, అతని భార్యను కొట్టి చంపేశారు. చిన్నారి ఏడుస్తుండటంతో బాబును గోడకు కొట్టి కిరాతకంగా చంపారు. అనంతరం మూడు మృతదేహాలను వేర్వేరు సంచుల్లో కట్టి దొంగచాటుగా పడేశారు. గౌరవ్ శవాన్ని బీచ్‌లో పడేయాలని తీసుకెళ్తుండగా బరువు ఎక్కువై ఇందిరా నగర్‌లోనే వదిలేసి పారిపోయారు.