ముంబైలోని శివాజీ నగర్ ప్రాంతంలో మంగళవారం మధ్యాహ్నం పట్టపగలే ఒక 19 ఏళ్ల యువతిని పాయింట్ బ్లాంక్ రేంజ్‌లో కాల్చి చంపారు. Love Triangle కారణంగానే ఈ హత్య జరిగినట్లు పోలీసులు ప్రాథమికంగా నిర్ధారించారు.
ఘటన వివరాలు: మృతురాలు షిఫా షేక్ (19) శివాజీ నగర్‌లోని ఫుర్కానియా మసీదు సమీపంలో హత్యకు గురైంది. ఈ కేసులో పోలీసులు 12 గంటల వ్యవధిలోనే ఇద్దరు నిందితులను అరెస్ట్ చేశారు. వారిలో ప్రధాన నిందితురాలు ఒక 25 ఏళ్ల మహిళ కాగా, ఆమెకు సహకరించిన 23 ఏళ్ల యువకుడిని కూడా అదుపులోకి తీసుకున్నారు.
మంగళవారం మధ్యాహ్నం ఒక మహిళ నుండి ఫోన్ రావడంతో షిఫా ఆమెను కలవడానికి ఇంటి నుండి బయటకు వచ్చింది. ఫుర్కానియా మసీదు ప్రాంతంలో వీరిద్దరి మధ్య ఏదో విషయంలో వాగ్వాదం జరిగింది. ఈ క్రమంలో నిందితురాలు తన వద్ద ఉన్న ఆయుధంతో షిఫా ముఖంపై అతి దగ్గర నుండి కాల్పులు జరిపింది. బుల్లెట్ ఆమె బుగ్గ గుండా దూసుకుపోయి పుర్రెలో ఇరుక్కుపోయింది.
ఆసుపత్రిలో మృతి: స్థానికులు వెంటనే బాధితురాలిని ఘాట్‌కోపర్ లోని రాజావాడి ఆసుపత్రికి తరలించారు. అయితే ఆమె ఆసుపత్రికి చేరుకునే లోపే మరణించినట్లు వైద్యులు ప్రకటించారు. సిసిటివి ఫుటేజ్ మరియు స్థానిక సమాచారం ఆధారంగా పోలీసులు నిందితులను వల పన్ని పట్టుకున్నారు.