వాషింగ్టన్/హ్యూస్టన్: అంతరిక్ష పరిశోధన చరిత్రలో నేడు ఒక స్వర్ణాధ్యాయం లిఖించబడింది. నాసా అత్యంత ప్రతిష్టాత్మకమైన ‘ఆర్టెమిస్-II’ (Artemis-II) మిషన్ దిగ్విజయంగా ముగిసింది. పది రోజుల పాటు చందమామ చుట్టూ ప్రదక్షిణలు చేసి, విశ్వాంతరాళంలో అద్భుతాలను వీక్షించిన నలుగురు వ్యోమగాములు సోమవారం తెల్లవారుజామున పసిఫిక్ మహాసముద్రంలో సురక్షితంగా ల్యాండ్ అయ్యారు. 1972 తర్వాత మళ్ళీ చంద్రుడి చెంతకు మనిషిని పంపిన దేశంగా అమెరికా తన ఆధిపత్యాన్ని మరోసారి చాటుకుంది.
నిప్పులు చిమ్ముకుంటూ.. మృత్యువును గెలిచి!
భూమికి తిరిగి వచ్చే ప్రయాణం అత్యంత ఉత్కంఠభరితంగా సాగింది. వ్యోమగాములు ఉన్న ‘ఒరియన్’ వ్యోమనౌక గంటకు 25,000 మైళ్ల వేగంతో భూ వాతావరణంలోకి ప్రవేశించింది. ఆ సమయంలో గాలితో ఏర్పడిన ఘర్షణ వల్ల నౌక చుట్టూ ఏకంగా 5,000 డిగ్రీల ఫారెన్‌హీట్ ఉష్ణోగ్రత ఉత్పన్నమైంది.
- 6 నిమిషాల ఉత్కంఠ: ఈ విపరీతమైన ఉష్ణోగ్రత కారణంగా భూమితో కమ్యూనికేషన్ సుమారు 6 నిమిషాల పాటు తెగిపోయింది (బ్లాక్ అవుట్). ఆ సమయంలో శాస్త్రవేత్తల్లో తీవ్ర ఆందోళన నెలకొంది. చివరకు కమ్యూనికేషన్ పునరుద్ధరణ జరిగి, నౌక సురక్షితంగా కనిపివచ్చినప్పుడు నాసా కార్యాలయంలో కరతాళ ధ్వనులు మిన్నంటాయి.
కళ్లు చెదిరే ల్యాండింగ్!
నౌక వేగాన్ని తగ్గించడానికి పారాచూట్ వ్యవస్థను అత్యంత ఖచ్చితత్వంతో ఉపయోగించారు.
- మొదటి దశ: 25,000 అడుగుల ఎత్తులో రెండు చిన్న ‘డ్రోగ్’ పారాచూట్లు విచ్చుకుని వేగాన్ని నియంత్రించాయి.
- రెండో దశ: 6,000 అడుగుల ఎత్తులో మూడు భారీ ఆరెంజ్ రంగు మెయిన్ పారాచూట్లు విచ్చుకోవడంతో నౌక వేగం గంటకు కేవలం 20 మైళ్లకు పడిపోయింది. భారత కాలమానం ప్రకారం తెల్లవారుజామున 5.37 గంటలకు కాలిఫోర్నియా తీరంలోని సన్ డియాగోకు 60 మైళ్ల దూరంలో పసిఫిక్ సముద్రంలో నౌక సురక్షితంగా దిగింది (స్ప్లాష్‌డౌన్). అక్కడే సిద్ధంగా ఉన్న యూఎస్ఎస్ జాన్ పి. ముర్తా నౌక సిబ్బంది, హెలికాప్టర్ల సాయంతో వ్యోమగాములను రక్షించారు.
చరిత్ర సృష్టించిన నలుగురు యోధులు!
ఈ మిషన్‌లో పాల్గొన్న నలుగురు వ్యోమగాములు ప్రపంచ అంతరిక్ష చరిత్రలో తమ పేర్లను సువర్ణాక్షరాలతో లిఖించుకున్నారు:
- రీడ్ వైస్‌మ్యాన్: మిషన్ కమాండర్.
- విక్టర్ గ్లోవర్: చంద్రుడి వద్దకు వెళ్లిన తొలి నల్లజాతీయుడు.
- క్రిస్టినా కోచ్: చంద్రుడి ప్రయాణంలో పాల్గొన్న తొలి మహిళ.
- జెరెమీ హాన్సెన్: కెనడా తరఫున అంతరిక్షంలోకి వెళ్లిన తొలి వ్యోమగామి.
ముందుంది అసలైన ‘చంద్ర’యానం!
ఏప్రిల్ 1న ప్రపంచంలోనే అత్యంత శక్తివంతమైన ‘ఎస్‌ఎల్ఎస్’ (SLS) రాకెట్ ద్వారా ప్రారంభమైన ఈ యాత్రలో మానవాళి మునుపెన్నడూ ప్రయాణించని దూరం (2,52,757 మైళ్లు) ప్రయాణించి రికార్డు సృష్టించారు. భూమికి ఎప్పుడూ కనిపించని చంద్రుడి ‘మరో కోణాన్ని’ (Far side of the moon) వీరు దగ్గరగా చూసి పరిశోధనలు చేశారు. ఈ విజయం 2027లో చంద్రుడిపై మనిషిని దించే ‘ఆర్టెమిస్-III’ ప్రయోగానికి బలమైన పునాది వేసింది.
ప్రస్తుతం నలుగురు వ్యోమగాములు వైద్యుల పర్యవేక్షణలో ఉన్నారు. “మానవాళి మళ్లీ చందమామపై అడుగు పెట్టడానికి తలుపులు తెరుచుకున్నాయి” అని అంతరిక్ష రంగ నిపుణులు సంతోషం వ్యక్తం చేస్తున్నారు.