కొంతమంది చర్మంతో కూడిన కోడి మాంసాన్ని ఇష్టపడితే, మరికొందరు చర్మం లేని (Skinless) మాంసాన్ని తింటారు. అయితే, చర్మంతో కూడిన చికెన్ తినడం వల్ల ఆరోగ్యంపై ఎలాంటి ప్రభావం ఉంటుందో ఇప్పుడు చూద్దాం.
పౌష్టికాహార పరంగా చూస్తే, చికెన్ చర్మంలో కొవ్వు మరియు కేలరీలు ఎక్కువగా ఉంటాయి. చర్మం లేని మాంసంతో పోలిస్తే, చర్మం ఉన్న మాంసంలో రెండు రెట్లు ఎక్కువ కొవ్వు ఉంటుంది. అయితే, ఇందులో ఉండే కొవ్వులో కొంత భాగం ఆరోగ్యకరమైన కొవ్వుగా పరిగణించబడుతుంది.
ప్రయోజనాలు:
- రుచి మరియు తాజాదనం: చర్మం ఉన్న కోడి మాంసం వంటకు మంచి రుచిని ఇస్తుంది మరియు మాంసం త్వరగా ఎండిపోకుండా తాజా ఉంచుతుంది.
- పోషకాలు: చర్మంలో కొల్లాజెన్ మరియు ప్రొటీన్లు ఉంటాయి, ఇవి మన చర్మ ఆరోగ్యానికి మేలు చేస్తాయి. అలాగే ఇందులో విటమిన్ ఏ మరియు బి-లు సమృద్ధిగా ఉంటాయి.
ప్రతికూలతలు:
- గుండె ఆరోగ్యం: కోడి చర్మంలో శాచురేటెడ్ ఫ్యాట్ (Saturated Fat) అధికంగా ఉండటం వల్ల గుండె సంబంధిత సమస్యలకు దారితీయవచ్చు.
- బరువు పెరగడం: బరువు తగ్గాలనుకునే వారికి ఇందులోని అదనపు కేలరీలు ఇబ్బంది కలిగిస్తాయి.
- కొలెస్ట్రాల్: కొలెస్ట్రాల్ సమస్య ఉన్నవారు చర్మంతో కూడిన మాంసాన్ని తక్కువగా తీసుకోవడం మంచిది.
ఆరోగ్యకరంగా ఎలా తీసుకోవాలి?
- వండే విధానం: కోడి మాంసాన్ని నూనెలో వేయించడం (Frying) కంటే ఆవిరిపై ఉడికించడం (Steaming) శ్రేయస్కరం. వేయించడం వల్ల అదనపు కొవ్వు చేరుతుంది.
- చిన్న చిట్కా: మాంసాన్ని ఉడికించేటప్పుడు చర్మంతో కలిపి వండి, తినేముందు చర్మాన్ని తొలగించడం ఒక తెలివైన పద్ధతి. దీనివల్ల మాంసం రుచిగా ఉంటుంది మరియు అదనపు కొవ్వు శరీరంలోకి చేరదు.
- ఎవరు తినవచ్చు?: ఆరోగ్యంగా ఉన్నవారు పరిమితంగా చర్మంతో కూడిన చికెన్ తినవచ్చు. కానీ మధుమేహం (Diabetes), గుండె సమస్యలు లేదా అధిక బరువు ఉన్నవారు స్కిన్‌లెస్ చికెన్ తీసుకోవడమే ఉత్తమం.
నాటు కోడి చర్మం మేలు:
బాయిలర్ లేదా ఫామ్ కోళ్లతో పోలిస్తే నాటు కోడి చర్మం ఆరోగ్యకరమైనది. ఇందులో ప్రోటీన్, విటమిన్ బి, డి, ఇ లతో పాటు జింక్, ఐరన్ మరియు సెలీనియం వంటి ఖనిజాలు ఉంటాయి. నాటు కోడిలో కొవ్వు శాతం తక్కువగా ఉండి, గుండె ఆరోగ్యానికి కూడా మంచిది. (గమనిక: మందులు వాడకుండా సహజంగా పెరిగిన నాటు కోడి మాత్రమే ఆరోగ్యానికి మేలు చేస్తుంది).
(రచయిత: డా. ఎడ్వినా రాజ్, హెడ్ – క్లినికల్ న్యూట్రిషన్ అండ్ డైటెటిక్స్ విభాగం, ఆస్టర్ సిఎంఐ హాస్పిటల్, బెంగళూరు)