నాగ్పూర్ క్రైమ్ న్యూస్: నాగ్పూర్ పరిధిలోని సావ్నేర్-సౌసర్ హైవేపై ఉన్న కేల్వాడ్ ప్రాంతంలో ఒక పెట్రోల్ బంక్ ఉద్యోగిపై ఆరుగురు యువకుల ముఠాలోని ఒకడు కత్తితో అత్యంత దారుణంగా దాడి చేశాడు. కేవలం ఒక చిన్నపాటి వాగ్వాదం కారణంగానే ఈ ఘాతుకం చోటుచేసుకుంది.
సామాజిక మాధ్యమాల్లో వైరల్ అవుతున్న వీడియోల ప్రకారం.. ఆరుగురు యువకులు ద్విచక్ర వాహనాలపై పెట్రోల్ బంక్కు చేరుకున్నారు. అక్కడ విధుల్లో ఉన్న రవి బాంగ్డే అనే ఉద్యోగితో వారు ఏదో విషయమై గొడవకు దిగారు.
సీసీటీవీ ఫుటేజీలో బయటపడ్డ దారుణం
‘ది న్యూస్ మినిట్’ షేర్ చేసిన సీసీటీవీ ( CCTV ) ఫుటేజీ ఆధారంగా.. ఆ ఇద్దరి మధ్య జరిగిన వివాహం కాస్తా పెద్దదై హింసాత్మకంగా మారింది. గొడవ జరుగుతుండగానే, ఆ ముఠాలోని ఒక యువకుడు హఠాత్తుగా కత్తి తీసి సదరు ఉద్యోగి వీపుపై బలంగా పొడిచాడు. తీవ్ర నొప్పితో ఆ ఉద్యోగి భయంతో విలవిలలాడటం ఆ వీడియోలో స్పష్టంగా కనిపిస్తోంది. దాడి చేసిన అనంతరం నిందితుడు తన స్నేహితులతో కలిసి అక్కడి నుండి పరారయ్యాడు. ప్రస్తుతం ఈ గొడవకు గల అసలు కారణం తెలియరాలేదు. అలాగే ఈ ఘటనపై పోలీసులు ఎలాంటి కేసు నమోదు చేశారనే పూర్తి వివరాలు ఇంకా అందుబాటులోకి రాలేదు.
ఆసుపత్రిలో చికిత్స పొందుతున్న ఉద్యోగి
ఈ దాడిలో రవి బాంగ్డేకు తీవ్ర గాయాలయ్యాయి. రక్తం మడుగులో ఉన్న అతడిని స్థానికులు తక్షణమే చికిత్స నిమిత్తం నాగ్పూర్ మెడికల్ కాలేజ్ ఆసుపత్రికి తరలించారు. ప్రస్తుతం అతని పరిస్థితి అత్యంత ఆందోళనకరంగా ఉన్నట్లు వైద్య నివేదికలు తెలుపుతున్నాయి.