బెంగళూరు: క్రికెట్ అభిమానుల పిచ్చిని ఆసరాగా చేసుకుని సొమ్ము చేసుకుంటున్న ఒక భారీ ముఠాను బెంగళూరు సీసీబీ (CCB) పోలీసులు పట్టుకున్నారు. ఐపీఎల్ క్రేజ్ను పెట్టుబడిగా మార్చుకుని, సామాన్య అభిమానుల జేబులకు కన్నం వేస్తున్న ఈ చీకటి దందాను ఛేదించి, నగర పోలీసు యంత్రాంగం సంచలనం సృష్టించింది.
క్యాంటీన్ లోపలే కుట్ర!
చిన్నస్వామి స్టేడియం లోపల పనిచేస్తున్న ‘శ్రీ లక్ష్మి క్యాంటీన్’ ఉద్యోగి పి. చంద్రశేఖర్ ఇప్పుడు పోలీసుల అతిథిగా మారాడు. లోపలే ఉంటూ కంచె చేను మేసిన చందంగా ఇతను టికెట్ల బ్లాక్ మార్కెట్కు తెరలేపాడు.
- షాకింగ్ రేట్లు: కేవలం రూ. 1,200 ముఖ విలువ కలిగిన టికెట్ను ఏకంగా రూ. 15,000 నుంచి రూ. 19,000 వరకు విక్రయిస్తుండగా పోలీసులు దాడి చేసి పట్టుకున్నారు.
- భారీగా టికెట్లు: నిందితుడి వద్ద నుంచి సుమారు 100కు పైగా ఐపీఎల్ టికెట్లను సీసీబీ పోలీసులు స్వాధీనం చేసుకున్నారు.
పెద్ద తలకాయల హస్తం? కేఎస్సీఏ సభ్యుడిపై ఆరోపణలు!
ఈ కేసులో దిమ్మతిరిగే వాస్తవాలు వెలుగులోకి వచ్చాయి. కర్ణాటక స్టేట్ క్రికెట్ అసోసియేషన్ (KSCA) సభ్యుడైన గణేష్ హరికేష్ సూచనల మేరకే తాను ఈ టికెట్లను విక్రయిస్తున్నట్లు నిందితుడు చంద్రశేఖర్ పోలీసు విచారణలో నోరు విప్పాడు. హరికేష్ స్వయంగా ఈ టికెట్లను ఇచ్చి, భారీ ధరలకు అమ్మాలని పురమాయించినట్లు తెలుస్తోంది.
ఏయే మ్యాచ్ల టికెట్లు?
మార్చి 28న జరిగిన RCB vs SRH మ్యాచ్కు సంబంధించిన 81 టికెట్లు, అలాగే RCB vs LSG మ్యాచ్కు సంబంధించిన 100 టికెట్లను ఈ ముఠా అక్రమంగా తన వద్ద ఉంచుకుంది. టికెట్ల బ్లాక్ విక్రయాలకు సహకరించిన కొన్ని ప్రైవేట్ కంపెనీల మేనేజింగ్ డైరెక్టర్ల (MD)పై కూడా సీసీబీ ఎఫ్ఐఆర్ (FIR) నమోదు చేసింది.
బ్లాక్ మార్కెట్ బెంబేలు – పోలీసుల హెచ్చరిక!
ఐపీఎల్ టికెట్ల అక్రమ విక్రయాలపై ఇప్పటివరకు నగరంలో 10 కేసులు నమోదయ్యాయని సీసీబీ డీసీపీ శ్రీహరి బాబు తెలిపారు. అక్రమాలకు పాల్పడే వారు ఎంతటి వారైనా వదిలిపెట్టే ప్రసక్తే లేదని, కఠిన చర్యలు తీసుకుంటామని ఆయన హెచ్చరించారు.
అభిమానులకు సూచన: క్రికెట్ పై మీకున్న ఇష్టాన్ని ఆసరాగా చేసుకుని దోచుకునే ఇలాంటి బ్లాక్ దందాగాల్ల ఉచ్చులో పడకండి. మీ కష్టార్జితాన్ని వారికి పోయకండి. టికెట్లను కేవలం అధికారిక వెబ్సైట్లు లేదా కౌంటర్ల ద్వారా మాత్రమే కొనుగోలు చేయండి.