హాపుడ్: చీకటి రాత్రి వేళ హాపుడ్ జిల్లా పిల్‌ఖువా ప్రాంతంలోని ఒక గ్రామంలో, తన తండ్రి కళ్ల ముందే 14 ఏళ్ల మైనర్ బాలిక ఒక ఆడబిడ్డకు జన్మనిచ్చింది. ఒకవైపు ప్రసవ వేదనతో ఆ బాలిక విలవిలలాడుతుంటే, మరోవైపు తన చిన్నారి కూతురు తల్లి కావడం చూసి ఆ తండ్రి, కుటుంబ సభ్యులు షాక్‌కు గురయ్యారు. కొంచెం స్పృహలోకి వచ్చిన తర్వాత ఆ బాలిక కళ్ల నీళ్లతో, వణుకుతున్న పెదవులతో చెప్పిన నిజం అందరినీ ఉలిక్కిపడేలా చేసింది.
నిందితుడిపై కేసు నమోదు:
పక్కింట్లో నివసించే, వరసకు తాతయ్య అయ్యే ఇస్లాం అనే వ్యక్తి తనను బలవంతంగా ఇంట్లో బంధించి పలుమార్లు అత్యాచారం చేశాడని ఆ బాలిక తన తండ్రికి వివరించింది. ఈ విషయం ఎవరికైనా చెబితే చంపేస్తానని బెదిరించాడని తెలిపింది. తండ్రి ఇచ్చిన ఫిర్యాదు మేరకు పోలీసులు నిందితుడిపై కేసు నమోదు చేశారు.
అసలేం జరిగిందంటే:
పోలీసు రిపోర్టు ప్రకారం.. ఫిబ్రవరి 14 రాత్రి 8 గంటల సమయంలో కుటుంబ సభ్యులందరూ కలిసి కూర్చుని ఉండగా, ఆ మైనర్ బాలికకు ఒక్కసారిగా కడుపునొప్పి మొదలైంది. ఇంట్లోని మహిళలు ఆమెను మంచంపై పడుకోబెట్టారు. కుటుంబ సభ్యులు డాక్టరును పిలవడానికి వెళ్లే లోపే, ఆ బాలిక ఒక పాపకు జన్మనిచ్చింది. ఆ పసిపాప ఏడుపు విని అందరూ నిర్ఘాంతపోయారు.
పాప పుట్టిన తర్వాత ఆ బాలిక ముఖంలో భయం, నిస్సహాయత కనిపించాయి. ఆ పాపకు తండ్రి పక్కింటి ఇస్లాం అని ఆమె చెప్పింది. ఈ చేదు నిజం విన్న తండ్రి ఆగ్రహంతో నిందితుడి ఇంటికి వెళ్లగా, అతను అక్కడ లేడు. వెంటనే ఆయన పోలీస్ స్టేషన్‌కు వెళ్లి ఫిర్యాదు చేశారు.
స్టేషన్ ఇన్‌ఛార్జ్ ముందు ఆ తండ్రి కన్నీరుమున్నీరవుతూ.. “సాబ్.. ఇస్లాంను నా కూతురు తాతయ్య అని పిలిచేది. వాడు నా కూతురి జీవితాన్ని నాశనం చేశాడు. సమాజంలో మా పరువు తీశాడు. వాడికి కఠినమైన శిక్ష పడేలా చూడండి” అని వేడుకున్నారు.
పిల్‌ఖువా స్టేషన్ ఇన్‌ఛార్జ్ మనీష్ చౌహాన్ స్పందిస్తూ.. నిందితుడిపై కేసు నమోదు చేశామని, అతని కోసం గాలింపు చర్యలు చేపట్టామని, త్వరలోనే అరెస్టు చేస్తామని తెలిపారు.