నాగ్‌పూర్: నాగ్‌పూర్‌లోని బహదుర రోడ్ పరిధిలో ఒక గుండెలవిసే ఘటన వెలుగుచూసింది. అన్నం తిన్న కొద్ది నిమిషాల్లోనే ఒక యువతి ప్రాణాలు కోల్పోయింది. అన్నం వండే సమయంలో జరిగిన ఒక చిన్న పొరపాటు ఆమె ప్రాణాలను బలితీసుకుంది. ఈ ఘటనతో నాగ్‌పూర్ మరియు పరిసర ప్రాంతాల్లో విషాద ఛాయలు అలుముకున్నాయి.
మృతి చెందిన యువతిని మానవశక్తి సొసైటీకి చెందిన 17 ఏళ్ల మాహి కిశోర్ ఉమాలేగా గుర్తించారు. డిసెంబర్ 20న జరిగిన ఈ ఘటన ఆమె కుటుంబాన్ని తీవ్ర విషాదంలో ముంచెత్తింది.
నాగ్‌పూర్ యువతికి ఏమైంది? అందిన సమాచారం ప్రకారం, డిసెంబర్ 20 సాయంత్రం మాహి ఇంట్లో వంట చేసేందుకు సిద్ధమైంది. ఇంట్లోని స్టీల్ డబ్బాలో బియ్యం నిల్వ ఉంచారు. మాహి హడావుడిలో లేదా అజాగ్రత్తగా బియ్యాన్ని సరిగ్గా ఏరుకోకుండా (తనిఖీ చేయకుండా) నేరుగా వండటానికి తీసుకోని ఉడికించింది.
అయితే, ఆ బియ్యం డబ్బాలో పురుగులు పట్టకుండా ఉండేందుకు కుటుంబ సభ్యులు ‘పురుగుల నివారణ బిళ్ళ’ (Pesticide/Sulphas tablet) వేశారు. మాహి బియ్యాన్ని శుభ్రం చేయకుండానే వండటంతో, ఆ విషపూరితమైన బిళ్ళ కూడా అన్నంతో పాటే ఉడికిపోయింది. అది గమనించని మాహి ఆ అన్నం తినడంతో కొద్ది సేపటికే ఆమె ఆరోగ్యం విషమించింది.
చికిత్స పొందుతూ మృతి అన్నం ద్వారా విషం శరీరంలోకి చేరిందని గుర్తించిన కుటుంబ సభ్యులు ఆమెను వెంటనే సమీపంలోని ఆసుపత్రికి తరలించారు. వైద్యులు ఆమెను కాపాడేందుకు శతవిధాలా ప్రయత్నించినప్పటికీ, అప్పటికే విషం శరీరం మొత్తం పాకడంతో మాహి పరిస్థితి విషమించి మరణించింది. కేవలం 17 ఏళ్ల వయసులో, ఒక చిన్న పొరపాటు కారణంగా తన ప్రాణాలను కోల్పోవడంతో ఉమాలే కుటుంబం కన్నీరుమున్నీరవుతోంది.