ముంబైలోని వ్యాపార సముదాయాల ప్రాంతంలో ఉన్న పురాతన చెట్లకు, గుర్తుతెలియని వ్యక్తులు రసాయన ఇంజెక్షన్లు ఇచ్చి నాశనం చేసిన దిగ్భ్రాంతికర సంఘటన వెలుగులోకి వచ్చింది.
దీనిని దర్యాప్తు చేయడంలో నవీ ముంబై మున్సిపల్ కార్పొరేషన్ చూపిన నిర్లక్ష్యాన్ని నిరసిస్తూ, స్థానిక ప్రజలు, పర్యావరణ ప్రేమికులు కలిసి చెట్లను కాపాడేందుకు రంగంలోకి దిగారు.
సంఘటన గురించి సమాచారం అందుకున్న కార్పొరేషన్ అధికారులు, కేవలం సున్నం మాత్రమే పూసి వెళ్లిపోయినట్లు సమాచారం. రంధ్రాలు చేసి రసాయనాలు నింపిన చెట్లకు కేవలం సున్నం పూయడం సరైన పరిష్కారం కాదని ఆగ్రహించిన స్థానికులు, పర్యావరణ వేత్త పరమ్‌దీప్ గరేవాల్ నాయకత్వంలో ఏకమై చెట్లకు శాస్త్రీయ పద్ధతిలో చికిత్స చేయడం ప్రారంభించారు.
పర్యావరణ నిపుణుడు రాజీవ్ పాటిల్ మార్గదర్శకత్వంలో చెట్ల గాయాలకు ‘బోర్డో పేస్ట్’ (Bordeaux Paste) పూశారు. అంతేకాకుండా, చెట్ల చుట్టూ ఉన్న నిర్మాణ వ్యర్థాలు, కలుపు మొక్కలను తొలగించి, మట్టిని లూజ్ చేశారు. వేర్ల భాగానికి అవసరమైన హ్యూమిక్ యాసిడ్, వానపాముల ఎరువు (వర్మీ కంపోస్ట్) మరియు పోషక ఎరువులను అందించి, సమీపంలో ఉన్న పోలీస్ స్టేషన్ నుండి నీటిని తీసుకువచ్చి పోశారు.
సుమారు ₹7,400 సొంత ఖర్చుతో అన్ని వస్తువులను కొనుగోలు చేసి, స్థానికులు మరియు ‘నాట్‌కనెక్ట్’ (NatConnect) సంస్థ ప్రతినిధులు కలిసి ఈ రక్షణ చర్య చేపట్టారు. కంటికి కనిపించే గాయాలకు చికిత్స అందించడమే కాకుండా, మట్టి సారాన్ని పునరుద్ధరించి చెట్లకు మళ్లీ ప్రాణప్రతిష్ఠ చేయడమే తమ ప్రధాన లక్ష్యమని వారు తెలిపారు.
ప్రకృతి ప్రేమికులు చేపట్టిన ఈ ఆపరేషన్‌పై ఇంటర్నెట్‌లో ప్రశంసలు వెల్లువెత్తుతున్నాయి. అదే సమయంలో, చెట్లకు రసాయన ఇంజెక్షన్లు ఇచ్చి నాశనం చేయడానికి యత్నించిన గుర్తుతెలియని వ్యక్తులపై కఠిన చర్యలు తీసుకోవాలని, ఆ ప్రాంతంలో నిఘాను పెంచాలని స్థానికులు మున్సిపల్ కార్పొరేషన్‌ను డిమాండ్ చేశారు.
Leave a Reply