చెన్నైలోని ఏటీఎంలలో సాంకేతిక పరిజ్ఞానాన్ని ఉపయోగించి నగదు దొంగిలిస్తున్న ఉత్తరప్రదేశ్ యువకుడిని పోలీసులు అరెస్ట్ చేశారు. పరారీలో ఉన్న అతని సహచరుడి కోసం గాలింపు చర్యలు చేపట్టారు.
ఏం జరిగింది?
చెన్నైలోని వ్యాసర్పాడి ప్రాంతంలో ఉన్న ఒక జాతీయ బ్యాంకు ఏటీఎంలో తరచూ సాంకేతిక సమస్యలు వస్తున్నట్లు బ్యాంకు అధికారులకు ఫిర్యాదులు అందాయి. నగదు విత్‌డ్రా చేసినట్లు ఫోన్‌కు మెసేజ్ వస్తున్నా, మెషీన్ నుండి డబ్బులు రావడం లేదని కస్టమర్లు ఆందోళన వ్యక్తం చేశారు.
గుట్టు రట్టు చేసిన ఇంజనీర్లు:
ఈ ఫిర్యాదులపై దర్యాప్తు చేసేందుకు ఏటీఎం సర్వీసింగ్ ఇంజనీర్లు జాషువా, కుమరన్ ఏటీఎం కేంద్రాన్ని సందర్శించారు. మెషీన్‌ను పరిశీలించగా, నగదు బయటకు వచ్చే స్లాట్ (Shutter) వద్ద ఒక చిన్న ఇనుప ముక్కను టేపుతో అంటించి ఉండటాన్ని వారు గుర్తించారు.
దీనివల్ల కస్టమర్లు విత్‌డ్రా చేసే నగదు ఆ ఇనుప ముక్కకు అడ్డుపడి లోపలే ఉండిపోతుంది. కస్టమర్ వెళ్ళిపోయిన తర్వాత, దొంగలు లోపలికి వచ్చి ఆ ఇనుప ముక్కను తీసి నగదును కాజేస్తారు. ఇది దొంగల పనే అని గ్రహించిన ఇంజనీర్లు నిఘా పెట్టారు.
నిందితుడి అరెస్ట్:
ఇంజనీర్లు బయటకు వెళ్ళినట్లు నటించగానే, ఒక యువకుడు ఏటీఎం లోపలికి వెళ్ళాడు. అతడిని పట్టుకుని నిలదీయగా పొంతన లేని సమాధానాలు చెప్పాడు. అతని బ్యాగును తనిఖీ చేయగా, ఏటీఎంలో వాడిన అంటు టేపులు, ఇనుప ముక్కలు దొరికాయి. ఇంజనీర్లు వెంటనే అతడిని వ్యాసర్పాడి పోలీసులకు అప్పగించారు.
పోలీసుల విచారణలో నిందితుడు ఉత్తరప్రదేశ్ రాష్ట్రం కాన్పూర్ జిల్లా దౌలత్‌పూర్ గ్రామానికి చెందిన వీర్ బహదూర్ (23) అని తేలింది. వాల్టాక్స్ రోడ్డులోని ఒక లాడ్జిలో ఉంటూ తన స్నేహితుడు అమర్ సింగ్‌తో కలిసి ఈ దొంగతనాలకు పాల్పడుతున్నట్లు అంగీకరించాడు.