మనం గాఢ నిద్రలో ఉన్నప్పుడో లేదా ద్విచక్ర వాహనంపై ప్రయాణిస్తున్నప్పుడో ఒక్కోసారి చెవిలో ఏదో వింత కదలిక లేదా శబ్దం వినిపిస్తుంది. ఏదైనా చిన్న చీమ లేదా పురుగు చెవిలోకి వెళ్లినప్పుడు కలిగే ఆ శబ్దం మనకు పిడుగు పడినట్లుగా అనిపిస్తుంది. దీనివల్ల కొందరికి కళ్లు తిరగడం, వాంతులు రావడం వంటివి జరగవచ్చు. ఆ సమయంలో కలిగే భయం వల్ల మనం చేసే కొన్ని పనులు, ఆ పురుగు చేసే నష్టం కంటే కూడా ఎక్కువ ప్రమాదాన్ని కలిగిస్తాయి.
భయం వద్దు: చాలామందికి ఉండే మొదటి భయం ఏమిటంటే.. ఆ పురుగు చెవిలోని కర్ణభేరిని తొలిచుకుని మెదడులోకి వెళ్లిపోతుందేమో అని. కానీ వైద్యపరంగా చూస్తే మన చెవి నిర్మాణం ఒక గుడ్డి సందు (Dead end) వంటిది. బాహ్య చెవి చివరన ‘కర్ణభేరి’ అనే పలుచని పొర ఉంటుంది. ఇది మధ్య చెవిని వేరు చేస్తుంది. ఏ చిన్న పురుగు కూడా ఈ పొరను దాటి మెదడులోకి వెళ్లలేదు. కాబట్టి అనవసరమైన భయాలను వదిలేయాలి.
ఏమి చేయకూడదు?
- వస్తువులను పెట్టవద్దు: చెవిలో కదలిక రాగానే హేర్ పిన్స్, తాళం చెవులు, అగ్గిపుల్లలు లేదా ఇయర్ బడ్స్ పెట్టి పురుగును తీయడానికి ప్రయత్నించకండి. దీనివల్ల పురుగు భయపడి ఇంకా లోపలికి వెళ్లే అవకాశం ఉంది. అది కర్ణభేరికి గాయం చేసి రక్తస్రావం లేదా వినికిడి లోపానికి దారితీయవచ్చు.
- నీళ్లు పోయవద్దు: పురుగును బయటకు పంపడానికి నేరుగా నీళ్లు పోయడం వల్ల అది తప్పించుకోవడానికి చేసే కదలికలతో విపరీతమైన నొప్పి వస్తుంది. అలాగే వైద్యుల సలహా లేకుండా నూనెలను వేడి చేసి పోయడం వల్ల కర్ణభేరి దెబ్బతింటుంది.
ఏమి చేయాలి? మొదట ప్రశాంతంగా ఉండండి. పురుగు వెళ్లిన వైపుకు తలను వాల్చండి. దీనివల్ల పురుగు తనంతట తానుగా బయటకు వచ్చే అవకాశం ఉంది. ఒకవేళ నొప్పిగా ఉంటే లేదా పురుగు బయటకు రాకపోతే వెంటనే ENT (చెవి, ముక్కు, గొంతు) నిపుణుడిని సంప్రదించండి. ఆసుపత్రిలో ప్రత్యేక పరికరాల ద్వారా నొప్పి లేకుండా నిమిషాల వ్యవధిలో పురుగును సురక్షితంగా బయటకు తీస్తారు.