చైనాలోని బీజింగ్, షాంఘై వంటి నగరాల్లోని బహిరంగ మరుగుదొడ్లు ఇప్పుడు కేవలం మూత్రశాలలుగానే మిగిలిపోలేదు. అవి అత్యాధునిక వైద్య పరీక్షా కేంద్రాలుగా రూపాంతరం చెందాయి. ఒక భారతీయ పర్యాటకుడు తన ఇన్స్టాగ్రామ్ పేజీలో పంచుకున్న వీడియోలో చైనాకు చెందిన ‘స్మార్ట్ యూరినల్’ (Smart Urinal) ఎలా పనిచేస్తుందో చూసి ప్రపంచం విస్తుపోతోంది.
అసలేం జరుగుతుంది? మీరు మూత్రం విసర్జించిన కేవలం 2 నిమిషాల్లోనే.. మీ శరీరంలోని గ్లూకోజ్ స్థాయి, మూత్రపిండాల పనితీరు, కాల్షియం మరియు విటమిన్-సి వంటి 14 కంటే ఎక్కువ ఆరోగ్య సూచికలను ఇది స్క్రీన్పై చూపిస్తుంది. దీనిని ఉపయోగించడానికి కేవలం 20 యువాన్లు (సుమారు రూ. 230) చెల్లించి, అక్కడ ఉన్న క్యూఆర్ (QR) కోడ్ను స్కాన్ చేస్తే సరిపోతుంది.
సాంకేతికత ఎలా పనిచేస్తుంది? ఇందులోని సెన్సార్లు మరియు కృత్రిమ మేధస్సు (AI) సాంకేతికత, తక్షణమే ఫలితాలను మీ మొబైల్లోని ‘వీచాట్’ (WeChat) యాప్కు పంపిస్తాయి. షాంఘై మాల్లో దీనిని ఉపయోగించిన ఒక భారతీయ పర్యాటకుడు మాట్లాడుతూ.. “నేను ఏదో సరదాగా పరీక్షించుకున్నాను, కానీ నా షుగర్ లెవల్స్ ఎక్కువగా ఉన్నట్లు రిపోర్ట్ రావడంతో షాక్ అయ్యాను. వెంటనే డాక్టర్ను సంప్రదించాను” అని తెలిపాడు.
ప్రాథమిక పరీక్షలకు ఇది ఎంతగానో ఉపయోగపడుతుందని వైద్యులు చెబుతున్నారు. చైనా సాధించిన ఈ అసాధారణ సాంకేతిక ప్రగతిని చూసి, “మన భారతదేశానికి ఇలాంటివి ఎప్పుడు వస్తాయి?” అని నెటిజన్లు ప్రశ్నిస్తున్నారు.