ఒడిశాలోని మయూర్భంజ్ జిల్లాలోని ఓ రెసిడెన్షియల్ పాఠశాలలో 9వ తరగతి చదువుతున్న ఓ విద్యార్థినిపై ఓ ప్రైవేట్ ఉపాధ్యాయుడు లైంగిక దాడికి పాల్పడినట్లు ఆరోపణలు వచ్చాయి. ఈ ఘటనలో విద్యార్థిని గర్భం దాల్చినట్లు వైద్య పరీక్షల్లో వెల్లడైంది.
ప్రాంతంలో తీవ్రమైన ఎండలు ఉండటంతో మార్చి నెలలోనే పాఠశాలలకు వేసవి సెలవులు ప్రకటించారు. ఈ సెలవుల సమయంలో విద్యార్థిని ఇంట్లో ఒంటరిగా ఉన్నప్పుడు ఈ దారుణ ఘటన జరిగినట్లు తెలుస్తోంది.
ఈ వారం ప్రారంభంలో పాఠశాలలో విద్యార్థులకు సాధారణ వైద్య పరీక్షలు నిర్వహించారు. ఈ పరీక్షల్లో 9వ తరగతి విద్యార్థిని సుమారు ఐదు నెలల గర్భంతో ఉన్నట్లు వైద్యులు గుర్తించారు. దీంతో పాఠశాల యాజమాన్యం ఒక్కసారిగా షాక్కు గురై, వెంటనే విద్యార్థిని తల్లిదండ్రులకు సమాచారం అందించింది.
తల్లిదండ్రులు విద్యార్థినితో మాట్లాడగా, తనకు జరిగిన ఘటన గురించి ఆమె వారికి వివరించినట్లు సమాచారం. ఈ విషయం ఎవరికీ చెప్పకూడదంటూ సంబంధిత ఉపాధ్యాయుడు తనను బెదిరించినట్లు కూడా విద్యార్థిని తల్లిదండ్రులకు తెలిపినట్లు తెలుస్తోంది.
దీంతో విద్యార్థిని తల్లిదండ్రులు పోలీసులకు ఫిర్యాదు చేశారు. ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు. ఆరోపణలు ఎదుర్కొంటున్న ప్రైవేట్ ఉపాధ్యాయుడిని పోలీసులు అరెస్ట్ చేశారు.
ప్రస్తుతం విద్యార్థినికి వైద్య పరీక్షలు నిర్వహించడంతో పాటు, ఘటనకు సంబంధించిన అన్ని కోణాల్లో పోలీసులు దర్యాప్తు కొనసాగిస్తున్నారు. మైనర్ బాలికపై జరిగిన ఈ ఘటనలో నిజానిజాలను వెలికితీసి, బాధితురాలికి న్యాయం చేసేందుకు పోలీసులు చర్యలు చేపట్టారు.
Leave a Reply