దేశంలో జనవరి 1, 2026 నుండి అన్ని కొత్త ద్విచక్ర వాహనాల్లో యాంటీ-లాక్ బ్రేకింగ్ సిస్టమ్ (ABS) తప్పనిసరి చేయాలనే నిర్ణయం ఇప్పుడు సందిగ్ధంలో పడింది. ఈ నిబంధన అమలులోకి రావడానికి ఇంకా ఒక్క రోజే సమయం ఉన్నప్పటికీ, వాహన తయారీ సంస్థలు (Automobile Companies) ఇప్పుడే దీనిని అమలు చేయలేమని చేతులెత్తేశాయి.
ఈ నిబంధనను పునరాలోచించాలని కంపెనీలు ప్రభుత్వాన్ని కోరాయి. దీనివల్ల జనవరి 1 గడువును మరికొంత కాలం పొడిగించే అవకాశం ఉన్నట్లు తెలుస్తోంది.
అసలు విషయం ఏంటి?
రోడ్డు ప్రమాదాలను తగ్గించే ఉద్దేశంతో ప్రభుత్వం ఈ ఏడాది జూన్‌లో ఒక ప్రతిపాదన తెచ్చింది. దీని ప్రకారం జనవరి 1, 2026 నుండి ఉత్పత్తి అయ్యే అన్ని కొత్త బైక్‌లు, స్కూటర్లకు ABS ఉండాలి. అయితే, వాహన తయారీ సంస్థలు ఇప్పుడు అదనపు సమయం కావాలని కోరుతున్నాయి.
కంపెనీల వాదనలు:
- విడిభాగాల కొరత: దేశంలో కొత్త బ్రేకింగ్ సిస్టమ్‌కు సంబంధించిన విడిభాగాల సరఫరా ప్రస్తుతం సరిపడా లేదు.
- ధరల పెరుగుదల: ఒక్కసారిగా అన్ని వాహనాలకు ABS నిలిపితే విడిభాగాల కొరత ఏర్పడి ఉత్పత్తిపై ప్రభావం పడుతుంది. అంతేకాకుండా, వాహనాల ధరలు పెరిగి ఆ భారం సామాన్య వినియోగదారులపై పడుతుంది.
- దశలవారీ అమలు: ఈ నిబంధనను ఒకేసారి కాకుండా దశలవారీగా అమలు చేయాలని కంపెనీలు సూచిస్తున్నాయి.
ప్రస్తుతం ఉన్న నిబంధనలు
ప్రస్తుతం మన దేశంలో 125cc కంటే ఎక్కువ సామర్థ్యం ఉన్న బైక్‌లకు మాత్రమే ABS తప్పనిసరి. చిన్న బైక్‌లు మరియు స్కూటర్లకు కేవలం కంబైన్డ్ బ్రేకింగ్ సిస్టమ్ (CBS) మాత్రమే ఉంది. భారతీయ బైక్ మార్కెట్లో సుమారు 84% వాటా ఈ తక్కువ ధర మరియు తక్కువ సామర్థ్యం గల వాహనాలదే.
ఇంకా వెలువడని నోటిఫికేషన్
అధికారుల సమాచారం ప్రకారం, గడువు దగ్గరపడుతున్నా ప్రభుత్వం నుండి ఇంకా ఎటువంటి అధికారిక నోటిఫికేషన్ వెలువడలేదు. దీనిని బట్టి కొత్త గడువును ప్రకటించే అవకాశం ఉందని స్పష్టమవుతోంది. కేంద్ర ప్రభుత్వం ప్రస్తుతం అన్ని ప్రత్యామ్నాయాలను పరిశీలిస్తోంది.
ABS ఎలా పనిచేస్తుంది?
యాంటీ-లాక్ బ్రేకింగ్ సిస్టమ్ (ABS) అనేది ఒక అధునాతన సాంకేతికత. అకస్మాత్తుగా బ్రేక్ వేసినప్పుడు చక్రాలు జామ్ (Lock) అవ్వకుండా ఇది చూస్తుంది. దీనివల్ల వాహనం అదుపు తప్పదు. బ్రేక్ వేసినప్పుడు చక్రాలపై ఒత్తిడిని నియంత్రిస్తూ వాహనం జారిపోకుండా (Skidding) అడ్డుకుంటుంది, తద్వారా ప్రమాదాలు తగ్గుతాయి.
ప్రభుత్వ లక్ష్యం ఏంటి?
భారతదేశంలో జరిగే రోడ్డు ప్రమాదాల్లో మరణిస్తున్న వారిలో 44% మంది ద్విచక్ర వాహనదారులే ఉంటున్నారని నిపుణులు చెబుతున్నారు. 2022 గణాంకాల ప్రకారం, దేశవ్యాప్తంగా జరిగిన 1.51 లక్షల ప్రమాదాల్లో 20% ద్విచక్ర వాహనాలవే. అందుకే వాహన భద్రతను పెంచడం ద్వారా ఈ ప్రాణనష్టాన్ని తగ్గించాలని ప్రభుత్వం భావిస్తోంది.