“జయలలిత 20 ఏళ్ల నాటి మాస్టర్ ప్లాన్”. మళ్లీ తెరపైకి తెస్తున్న తమిళనాడు ప్రభుత్వం?. సీఎం విజయ్ తీసుకున్న సంచలన నిర్ణయం..!

తమిళనాడు ప్రభుత్వం సుమారు రూ.1,200 కోట్ల అంచనాతో కొత్త సెక్రటేరియట్ (సచివాలయం) మరియు అసెంబ్లీ భవన సముదాయాన్ని నిర్మించాలని యోచిస్తోంది.

ఇందుకోసం చెన్నై మెరీనా బీచ్ సమీపంలోని పట్టినాపాక్కం ఫోర్‌షోర్ ఎస్టేట్ ప్రాంతంలో సుమారు 20 ఎకరాల విస్తీర్ణంలో ప్రాథమిక పనులు ప్రారంభించేందుకు ప్రభుత్వ ఉత్తర్వులు (జీవో) జారీ అయ్యాయి. అయితే, తీవ్రమైన ట్రాఫిక్ రద్దీ ఉండే ఈ ప్రాంతంలో సెక్రటేరియట్ నిర్మిస్తే రద్దీ మరింత పెరుగుతుందని రాజకీయ పార్టీలు, తమ జీవనోపాధి దెబ్బతింటుందని స్థానిక మత్స్యకార సంఘాలు వ్యతిరేకిస్తున్నాయి. దీంతో పట్టినాపాక్కం ప్రాజెక్టుకు బదులుగా ప్రత్యామ్నాయ స్థలాలను ప్రభుత్వం పరిశీలిస్తున్నట్లు సమాచారం.

పట్టినాపాక్కంలో వస్తున్న వ్యతిరేకత నేపథ్యంలో, ఈస్ట్ కోస్ట్ రోడ్ (ECR)లోని తిరువిడంతై, తైయూర్ ప్రాంతాలు మళ్లీ తెరపైకి వచ్చాయి. సుమారు 20 ఏళ్ల క్రితం దివంగత మాజీ ముఖ్యమంత్రి జయలలిత హయాంలో చెన్నై వెలుపల సమీకృత పరిపాలనా నగరాన్ని (Integrated Administrative City) నిర్మించేందుకు ఈస్ట్ కోస్ట్ రోడ్ ప్రాంతాలను పరిశీలించారు. ప్రస్తుతం ఆ ప్రాంతంలో భారీగా ప్రభుత్వ భూములు ఉన్నాయని సూచిస్తున్న నిపుణులు, భవిష్యత్ అవసరాలను దృష్టిలో ఉంచుకుని అక్కడే సెక్రటేరియట్ ఏర్పాటు చేయడం సముచితమని వాదిస్తున్నారు. అయితే, ఇటువంటి ప్రత్యామ్నాయ ప్రణాళికలేవీ ప్రస్తుతం పరిశీలనలో లేవని కొందరు సీనియర్ ప్రభుత్వ అధికారులు ఖండించారు.

అంతకుముందు 2000వ దశకం ప్రారంభంలో, మహాబలిపురం, తిరువిడంతై ప్రాంతాల్లో సుమారు 2,000 ఎకరాల విస్తీర్ణంలో కొత్త పరిపాలనా నగరాన్ని నిర్మించాలని ప్రణాళికలు రూపొందించారు. కానీ, మొత్తం ప్రభుత్వ యంత్రాంగాన్ని కలుపుకొని ఒక మెగా సిటీని నిర్మించడానికి 15 నుంచి 20 ఏళ్లు పడుతుందనే ఉద్దేశ్యంతో ఆ ప్రయత్నాన్ని విరమించుకున్నారు. ఆ తర్వాత, చెన్నైలోనే లేడీ విల్లింగ్టన్ కళాశాల, క్వీన్ మేరీస్ కళాశాల ప్రాంగణాలను పరిశీలించినప్పటికీ, స్థలాభావం కారణంగా భారీ స్థాయి పరిపాలనా కేంద్రాల ఏర్పాటులో ఇబ్బందులు ఎదురయ్యాయి.

రాబోయే 100 ఏళ్ల రాష్ట్ర అభివృద్ధి, పరిపాలనా అవసరాలను తీర్చాలంటే, చెన్నై వెలుపల 500 నుంచి 1,000 ఎకరాల విస్తీర్ణంలో కొత్త సమీకృత పరిపాలనా నగరాన్ని నిర్మించాలన్నది అర్బన్ ప్లానర్ల అభిప్రాయంగా ఉంది. కేవలం భూమి లభ్యత మాత్రమే కాకుండా, రోడ్డు కనెక్టివిటీ, భవిష్యత్ విస్తరణ, ప్రకృతి విపత్తులను తట్టుకునే సామర్థ్యం ఆధారంగా దీనిపై తుది నిర్ణయం తీసుకోనున్నారు. అందువల్ల, ప్రజా సంఘాల వ్యతిరేకతలను, భవిష్యత్ పరిపాలనా అవసరాలను దృష్టిలో ఉంచుకుని ప్రభుత్వం ఎలాంటి నిర్ణయం తీసుకుంటుందో వేచి చూడాలి.