తమిళనాడులోని తిరునెల్వేలి (నెల్లై) సమీపంలో యజమాని నిర్లక్ష్యం కారణంగా మూగజీవాలు బలికావడం స్థానికంగా కలకలం సృష్టించింది. కుక్కలను పెంచుకోవడం ఎంత ఇష్టమో, వాటిని అంతే జాగ్రత్తగా చూసుకోవడం కూడా యజమాని బాధ్యత అని ఈ సంఘటన గుర్తుచేస్తోంది.
అసలేం జరిగిందంటే? వల్లియూర్ ప్రాంతానికి చెందిన అలగేసన్ (50), నెల్లై రామయ్యన్‌పట్టి సమీపంలోని కమ్మాళంగుళం ప్రాంతంలో ఒక ఇంట్లో నివసిస్తూ ఖరీదైన విదేశీ జాతి కుక్కలను పెంచుకుంటున్నారు. ఒక పాత కేసులో అలగేసన్‌పై నాన్-బెయిలబుల్ వారెంట్ ఉండటంతో, సుమారు 15 రోజుల క్రితం మానూరు పోలీసులు ఆయనను అరెస్ట్ చేసి జైలుకు తరలించారు.
ఆకలితో అలమటించిన మూగజీవాలు: అరెస్ట్ సమయంలో అలగేసన్ తన ఇంట్లో ఉన్న కుక్కల గురించి గానీ, వాటి సంరక్షణ గురించి గానీ పోలీసులకు లేదా ఇతరులకు చెప్పలేదు. దీంతో ఆ ఇంట్లో లాక్ అయి ఉన్న కుక్కలకు 15 రోజులుగా ఆహారం, నీరు అందలేదు. ఆకలి దప్పులతో కొన్ని కుక్కలు అక్కడికక్కడే మరణించాయి. ఆ ప్రాంతంలో దుర్వాసన రావడంతో స్థానికులు జంతు సంరక్షణ కార్యకర్తలకు సమాచారం అందించారు.
ప్రాణాపాయ స్థితిలో కొన్ని కుక్కలు: పోలీసుల సహాయంతో జంతు సంరక్షణ కార్యకర్తలు ఆ ఇంట్లోకి ప్రవేశించగా, కొన్ని కుక్కలు చనిపోయి కనిపించాయి. ప్రాణాలతో పోరాడుతున్న మరికొన్ని ఖరీదైన కుక్కలను వారు రక్షించి చికిత్స అందిస్తున్నారు.
లక్షల విలువ చేసే కుక్కలు: సంరక్షకులు తెలిపిన వివరాల ప్రకారం.. ఆ ఇంట్లో రాట్‌వైలర్, బెల్జియం మెలినోయిస్, హస్కీ, లాబ్రడార్ మరియు గోల్డెన్ రిట్రీవర్ వంటి అత్యంత ఖరీదైన విదేశీ జాతి కుక్కలు ఉన్నాయి. వీటిలో ఒక బెల్జియం జాతి కుక్క విలువ సుమారు రూ. 1.25 లక్షల వరకు ఉంటుంది. ఇంత ఖరీదైన కుక్కలను యజమాని జైలుకు వెళ్లేటప్పుడు అలా వదిలేయడం నేరమని వారు ఆగ్రహం వ్యక్తం చేస్తున్నారు.
పోలీస్ ఫిర్యాదు: కుక్కలను సరైన పద్ధతిలో చూసుకోకుండా వాటి మరణానికి కారణమైన యజమాని అలగేసన్‌పై జంతు సంరక్షణ కార్యకర్తలు పోలీసులకు ఫిర్యాదు చేశారు. పోలీసులు అరెస్ట్ చేసినప్పుడే ఆయన కుక్కల గురించి చెప్పి ఉంటే ఈ విషాదం జరిగేది కాదని స్థానికులు ఆవేదన వ్యక్తం చేస్తున్నారు.