మనలో చాలా మందికి టాయిలెట్‌కు వెళ్ళినప్పుడు ఫోన్ చూడటం, రీల్స్ స్క్రోల్ చేయడం అలవాటు. గంటల తరబడి అక్కడే కూర్చుని, అసలు ఎందుకు వచ్చామో మర్చిపోయే వారు కూడా ఉంటారు. అయితే, ఇలా చేయడం వల్ల తీవ్రమైన ఆరోగ్య సమస్యలు వస్తాయని వైద్యులు హెచ్చరిస్తున్నారు.
వైద్యుల హెచ్చరిక!
టాయిలెట్ సీటుపై ఎక్కువ సేపు కూర్చోవడం వల్ల మొలలు (Piles/Hemorrhoids), పెల్విక్ (నడుము/కడుపు కింది భాగం) కండరాలు బలహీనపడటం వంటి సమస్యలు వస్తాయని ఆరోగ్య నిపుణులు చెబుతున్నారు. ముఖ్యంగా స్మార్ట్‌ఫోన్ల వాడకం వల్ల ప్రజలు 15 నిమిషాల కంటే ఎక్కువ సమయం టాయిలెట్‌లోనే గడుపుతున్నారు. ఇది ఏమాత్రం మంచిది కాదని వైద్యులు సూచిస్తున్నారు.
నిపుణులు ఏమంటున్నారు?
టెక్సాస్ విశ్వవిద్యాలయానికి చెందిన కొలొరెక్టల్ సర్జన్ డాక్టర్ లై జూ (Dr. Lai Xue) దీనిపై స్పందిస్తూ.. “చాలా మంది రోగులు మలవిసర్జన సమస్యలతో నా దగ్గరకు వస్తుంటారు. మేము వారిని అడిగే మొదటి ప్రశ్న – వారు టాయిలెట్‌లో ఎంత సమయం గడుపుతున్నారు అని.”
టాయిలెట్ సీటు డిజైన్ వల్ల కలిగే నష్టాలను ఆయన ఇలా వివరించారు:
- గురుత్వాకర్షణ ప్రభావం: మనం టాయిలెట్ సీటుపై కూర్చున్నప్పుడు మన శరీరం రక్తాన్ని తిరిగి గుండెకు పంపడానికి చాలా కష్టపడాల్సి వస్తుంది.
- అధిక ఒత్తిడి: టాయిలెట్ సీటు గుండ్రంగా లేదా కోడిగుడ్డు ఆకారంలో ఉండటం వల్ల, సాధారణ కుర్చీ మీద కూర్చున్న దానికంటే మలద్వారంపై ఎక్కువ ఒత్తిడి పడుతుంది. ఇది పెల్విక్ ఆర్గాన్ ప్రోలాప్స్ (పేగులు జారడం) వంటి సమస్యలకు దారితీయవచ్చు.
- రక్తనాళాల వాపు: టాయిలెట్ సీటు ఒక వాల్వ్ లాగా పనిచేస్తుంది. దీనివల్ల లోపలికి వచ్చే రక్తం తిరిగి వెళ్లలేక, రక్తనాళాలు వాచి మొలలు వచ్చే ప్రమాదం పెరుగుతుంది.
ముక్కడం వల్ల ప్రమాదం!
ఎక్కువ సేపు కూర్చోవడం వల్ల తెలియకుండానే మలవిసర్జన కోసం ఎక్కువ ఒత్తిడి (Straining) పెడతాము. దీనివల్ల నడుము కండరాలు దెబ్బతింటాయి. డాక్టర్ ఫరా మోన్సూర్ మాట్లాడుతూ.. ఫోన్ చూస్తూ సమయం మర్చిపోయి కూర్చోవడం వల్ల పెల్విక్ కండరాలపై అనవసరమైన భారం పడుతుందని తెలిపారు.
రక్తస్రావం జరిగితే జాగ్రత్త:
మీకు తరచుగా మలబద్ధకం సమస్య ఉంటే, అది జీర్ణకోశ వ్యాధుల సంకేతం కావచ్చు. ముఖ్యంగా మలవిసర్జన సమయంలో రక్తం పడితే అస్సలు నిర్లక్ష్యం చేయకుండా వెంటనే వైద్యుడిని సంప్రదించాలని నిపుణులు హెచ్చరిస్తున్నారు.