పాఠశాల అనగానే చదువుకోవడానికి, స్నేహితులతో కలిసి కూర్చుని ఆహారాన్ని పంచుకోవడానికి నిలయం. కానీ, ఇంటి నుంచి మెంతికూర తెచ్చుకున్నాడనే కారణంతో ఒక విద్యార్థి భోజనాన్ని అడ్డుకుంటే ఎలా ఉంటుంది?
మహారాష్ట్రలో చోటుచేసుకున్న ఈ విచిత్రమైన ఘటన ప్రస్తుతం తల్లిదండ్రులు, సామాజిక కార్యకర్తల్లో తీవ్ర దిగ్భ్రాంతిని రేకెత్తిస్తోంది.
మహారాష్ట్రలోని భయందర్ ఈస్ట్ ప్రాంతంలో ‘తపోవన్ స్కూల్’ ఉంది. ఇక్కడ చదువుతున్న ఒక విద్యార్థి తన మధ్యాహ్న భోజనానికి మెంతికూర వండుకుని తెచ్చుకున్నాడు. దాన్ని చూసిన పాఠశాల యాజమాన్యం, ఆ విద్యార్థి డైరీలో “మెంతికూర నిషేధించబడిన ఆహారం” అని రాసి ఇంటికి పంపించింది.
అంతటితో ఆగకుండా, ఆ బాలుడు తెచ్చిన ఆహారాన్ని తినకుండా అడ్డుకున్న పాఠశాల యాజమాన్యం, అతనికి స్కూల్ క్యాంటీన్ నుంచి బలవంతంగా ఆహారం ఇచ్చి దానికిగానూ రూ.20 రుసుము వసూలు చేసింది!
అసలు ఈ నిషేధం ఎందుకు? దీని వెనుక ఉన్న కారణమేంటి? ప్రస్తుతం జైనుల పవిత్ర పండుగ ‘పర్యుషన్’ (Paryushan) జరుగుతోంది. ఈ పాఠశాలలో జైన సమాజానికి చెందిన విద్యార్థులు ఎక్కువగా చదువుతుండటంతో, వారి మత విశ్వాసాలకు అనుగుణంగా పాఠశాల యాజమాన్యం కొన్ని నిబంధనలను తీసుకువచ్చింది. దాని ప్రకారం నేల కింద పండే దుంప కూరగాయలపై (వేరు కూరగాయలపై) నిషేధం విధించారు. మెంతికూర వంటి కొన్ని రకాల ఆకుకూరలపై కూడా ఆంక్షలు విధించారు.
ఈ పాఠశాలపై ఇలాంటి ఆరోపణలు రావడం ఇదే మొదటిసారి కాదు. కొన్ని రోజుల క్రితం ఉల్లిపాయలు, బంగాళాదుంపలు, అల్లం, బీట్‌రూట్, క్యారట్ వంటి కూరగాయలు తెచ్చిన విద్యార్థులకు రూ.50 జరిమానా విధించినట్లు కూడా ఆరోపణలు వచ్చాయి.
విద్యార్థుల స్వేచ్ఛా ఆహార హక్కును హరించడంపై తీవ్ర ఆగ్రహం వ్యక్తం చేసిన ‘మహారాష్ట్ర నవనిర్మాణ్ సేన’ (MNS) పార్టీ నాయకులు దీనిపై కఠినమైన ఫిర్యాదు చేశారు. ఈ ఫిర్యాదు ఆధారంగా మీరా-భయందర్ మున్సిపల్ కార్పొరేషన్ విద్యాశాఖ అధికారి సుల్భా వత్తారే (Sulabha Vattare), గత సెప్టెంబర్ 17న తపోవన్ స్కూల్‌కు వివరణ కోరుతూ ‘షోకాజ్’ నోటీసులు జారీ చేశారు. అయితే, పాఠశాల యాజమాన్యం మాత్రం ఇప్పటివరకు ఎలాంటి అధికారిక వివరణ ఇవ్వకుండా మౌనం వహిస్తోంది.
Leave a Reply