టీఎంసీ ప్రభుత్వం పశ్చిమ బెంగాల్ను ‘జంగిల్ రాజ్’ (అరాచక పాలన)గా మార్చిందని ప్రధానమంత్రి నరేంద్ర మోదీ ఆదివారం ఆరోపించారు. బెంగాల్ ప్రజలకు “మా, మాటి, మానుష్” (తల్లి, నేల, మనిషి) అని ఇచ్చిన నినాదానికి టీఎంసీ తూట్లు పొడిచిందని విమర్శిస్తూ, రాష్ట్రాన్ని కాపాడుకోవడానికి బిజెపికి మద్దతు ఇవ్వాలని ఆయన కోరారు.
‘మా, మాటి, మానుష్’ నినాదానికి ద్రోహం: పశ్చిమ బెంగాల్ రెండో విడత ఎన్నికల ప్రచారంలో భాగంగా జరిగిన ‘విజయ్ సంకల్ప్ సభ’లో ప్రధాని మోదీ ప్రసంగిస్తూ.. “టీఎంసీ పాలనలో ‘అమ్మ’ కన్నీరు పెడుతోంది, ‘నేల’ను సిండికేట్లు, చొరబాటుదారులకు అప్పగించారు, ఇక ‘మనిషి’ పరాయివాడిగా మారి రాష్ట్రం విడిచి వెళ్లాల్సిన పరిస్థితి ఏర్పడింది” అని ఆవేదన వ్యక్తం చేశారు.
15 ఏళ్ల క్రితం ఇదే నినాదంతో అధికారంలోకి వచ్చిన టీఎంసీ, ఇప్పుడు ఆ పదాలను ఉచ్చరించడానికి కూడా భయపడుతోందని, ఎందుకంటే ఆ మాటలు చెబితే వారి పాపాలు బయటపడతాయని ఆయన ఎద్దేవా చేశారు. మొదటి విడతలో బెంగాల్ ప్రజలు అద్భుతం చేశారని, రెండో విడతలో బిజెపికి చారిత్రాత్మక విజయాన్ని అందిస్తారని ఆయన ధీమా వ్యక్తం చేశారు.
నేతాజీ స్ఫూర్తితో మార్పు రావాలి: బెంగాల్ సామర్థ్యం గురించి ప్రస్తావిస్తూ.. “నేతాజీ సుభాష్ చంద్రబోస్ ‘మీరు నాకు రక్తాన్ని ఇవ్వండి, నేను మీకు స్వేచ్ఛను ఇస్తాను’ అని పిలుపునిచ్చారు. నేడు రాష్ట్రం అభివృద్ధి చెందాలంటే బెంగాల్కు మీ ఒక్క ఓటు కావాలి. మీరు మాకు ఆశీర్వాదాలు, ఓటు అందిస్తే.. మేము మిమ్మల్ని టీఎంసీ అరాచక పాలన నుండి విముక్తి చేస్తాం” అని మోదీ హామీ ఇచ్చారు. బెంగాల్ మళ్ళీ దేశంలో నంబర్ వన్ రాష్ట్రంగా మారుతుందని ఆయన పేర్కొన్నారు.
పరిశ్రమల వినాశనం – అవినీతే లక్ష్యం: టీఎంసీ హయాంలో పారిశ్రామిక అభివృద్ధి కుంటుపడిందని ప్రధాని ఆరోపించారు. ఒకప్పుడు మిల్లులు, పరిశ్రమలకు నిలయంగా ఉన్న హుగ్లీ నదీ పరివాహక ప్రాంతం మరియు 24 పరగణాల జిల్లాలో నేడు ఫ్యాక్టరీలు మూతపడుతున్నాయని ఆయన విమర్శించారు. బ్రిటీష్ కాలం నుండి నడుస్తున్న కర్మాగారాలు కూడా ఇప్పుడు నిలిచిపోయాయని, కేవలం ‘సిండికేట్ రాజ్’ మరియు అవినీతి మాత్రమే ఇక్కడ రాజ్యమేలుతోందని ఆయన దుయ్యబట్టారు.
ఎన్నికల నగారా: తొలి విడత ఎన్నికల్లో పశ్చిమ బెంగాల్లో రికార్డు స్థాయిలో 91.78 శాతం పోలింగ్ నమోదైంది. రెండో విడత పోలింగ్ ఏప్రిల్ 29న జరగనుండగా, మే 4వ తేదీన ఫలితాలు వెలువడనున్నాయి.