లండన్ సిల్వర్‌స్టోన్ సర్క్యూట్‌లో జరిగిన అంతర్జాతీయ కార్ రేసింగ్ మైదానంలో.. నటుడు, టీవీకే అధినేత విజయ్ పాల్గొన్న సమయంలో అక్కడున్న అభిమానులు ‘TVK… TVK…’ అంటూ బిగ్గరగా నినాదాలు చేస్తూ ప్రాంగణాన్ని హోరెత్తించారు.
అయితే, వెంటనే జోక్యం చేసుకున్న విజయ్.. అభిమానుల వైపు చూస్తూ రేసర్ అజిత్ కుమార్‌ను ఉత్సాహపరచాలంటూ సైగ చేసిన సంఘటన సోషల్ మీడియాలో విపరీతంగా వైరల్ అవుతోంది.
లండన్‌లో జరుగుతున్న ప్రముఖ కార్ రేసింగ్‌ను స్వయంగా జెండా ఊపి ప్రారంభించేందుకు విజయ్ సిల్వర్‌స్టోన్ మైదానానికి విచ్చేశారు. రేసింగ్ ట్రాక్ వద్దకు విజయ్ రాగానే, అక్కడ గుమిగూడిన వేలాది మంది తమిళ అభిమానులు తమ రాజకీయ పార్టీ నినాదమైన ‘TVK… TVK…’ అంటూ ఉత్సాహంగా కేకలు వేస్తూ మైదానాన్ని దద్దరిల్లేలా చేశారు.
అభిమానుల నినాదాలు వినగానే చిరునవ్వు నవ్విన విజయ్, తక్షణమే చేతులెత్తి సైగ చేశారు. “ఇది రాజకీయ వేదిక కాదు; రేస్ ట్రాక్‌లో బరిలోకి దిగిన మన అజిత్ కుమార్‌ను ఉత్సాహపరచండి!” అన్నట్లుగా ఆయన చేత్తో సైగ చేస్తూ అభిమానులను కోరారు.
విజయ్ చేసిన సైగను చూసిన వెంటనే అభిమానులు రాజకీయ నినాదాలను ఆపేసి.. ‘తల… తల…’ అంటూ అజిత్ కుమార్‌ను ఉత్సాహపరుస్తూ నినాదాలు చేయడం ప్రారంభించారు. క్రీడా మైదాన గౌరవాన్ని కాపాడుతూ, తన స్నేహితుడు అజిత్ కోసం విజయ్ చూపిన ఈ సంస్కారవంతమైన తీరు అక్కడున్న వారిని ఆశ్చర్యపరిచింది.
అభిమానులు రాజకీయ నినాదాలు చేస్తున్న వేళ.. స్నేహితుడి క్రీడను, అతడి శ్రమను ముందుంచిన విజయ్ సైగకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతూ నెటిజన్ల నుంచి ప్రశంసలు అందుకుంటున్నాయి.