మనం ప్రతిరోజూ ఉపయోగించే టీవీ రిమోట్‌లో ఎరుపు, పచ్చ, పసుపు మరియు నీలం రంగులలో కొన్ని బటన్లు ఉండటం మీరు గమనించే ఉంటారు. చాలా మంది వీటిని అస్సలు ఉపయోగించరు. అసలు ఇవి ఎందుకు ఉన్నాయి? వీటి వల్ల ప్రయోజనం ఏమిటి? అనే ప్రశ్న చాలా మందికి ఉంటుంది.
నిజానికి, ఈ కలర్ బటన్లు ఇంటర్నెట్ కనెక్షన్‌తో కూడిన స్మార్ట్ టీవీ సేవలను సులభంగా ఉపయోగించడం కోసం రూపొందించబడ్డాయి. ఏదైనా యాప్ లేదా మెనూలోకి వెళ్లడానికి పదే పదే వేర్వేరు బటన్లను నొక్కే పని లేకుండా, ఈ కలర్ బటన్లతో పనులను వేగంగా పూర్తి చేయవచ్చు. చాలా టీవీలు మరియు సెట్ టాప్ బాక్స్‌లలో డిజిటల్ వీడియో బ్రాడ్‌కాస్టింగ్ (DVB) అనే సాంకేతికతను ఉపయోగిస్తారు. స్క్రీన్‌పై కనిపించే మెనూలను మరియు ప్రత్యేక ఫీచర్లను నియంత్రించడానికి ఈ స్పెషల్ బటన్లను ఇస్తారు. అయితే వీటి పనితీరు మీరు ఉపయోగించే టీవీ బ్రాండ్ లేదా సెట్ టాప్ బాక్స్ కంపెనీని బట్టి మారుతుంటుంది.
ఏ బటన్ దేనికి ఉపయోగపడుతుంది?
పచ్చ బటన్ (Green Button): రిమోట్‌లోని పచ్చ రంగు బటన్ సాధారణంగా టీవీలో ప్రసారమయ్యే ప్రోగ్రామ్‌లను చూడటానికి, మెనూలో ఒక నిర్దిష్ట ఆప్షన్‌ను ఎంచుకోవడానికి లేదా యాప్‌లను ఓపెన్ చేయడానికి వాడతారు. కొన్ని టీవీలలో టీవీ గైడ్ చూస్తున్నప్పుడు రిమైండర్‌లను సెట్ చేయడానికి కూడా ఇది ఉపయోగపడుతుంది.
పసుపు బటన్ (Yellow Button): ఈ బటన్ సాధారణంగా అదనపు ఆప్షన్లను ఎంచుకోవడానికి లేదా సెట్టింగ్స్‌లోకి వెళ్లడానికి ఉపయోగపడుతుంది. కొన్ని టీవీలలో సబ్‌టైటిల్స్ (Subtitles) మార్చడానికి, భాషను మార్చుకోవడానికి లేదా ప్రోగ్రామ్ యొక్క పూర్తి వివరాలను చూడటానికి దీనిని వాడతారు.
నీలం బటన్ (Blue Button): ఏదైనా ఆప్షన్‌ను త్వరితగతిన ఎంచుకోవడానికి నీలం రంగు బటన్ సహాయపడుతుంది. ఉదాహరణకు, హెల్ప్ మెనూ ఓపెన్ చేయడానికి, నావిగేషన్ ఆప్షన్లను ఎంచుకోవడానికి లేదా ఇంటర్నెట్ ఆప్షన్లను ఓపెన్ చేయడానికి దీనిని ఉపయోగిస్తారు.