టెక్ ప్రపంచంలో సంచలనం: సిలికాన్ వ్యాలీని కుదిపేస్తున్న రహస్య జాబితా! 100 మందికి పైగా టెక్ దిగ్గజాలపై లైంగిక వేధింపుల ఆరోపణలు… ‘విస్పర్ నెట్‌వర్క్’ లీక్ చేసిన సంచలనాత్మక పత్రం!

ప్రపంచ సాంకేతిక రాజధాని అయిన సిలికాన్ వ్యాలీలో ఇప్పటివరకు వెలుగుచూడని అనేక షాకింగ్ నిజాలు ప్రస్తుతం బయటపడ్డాయి.

ప్రముఖ వెంచర్ క్యాపిటలిస్టులు, టెక్ కంపెనీల అగ్ర స్థాయి అధికారుల పేర్లు ఉన్న ఒక రహస్య పత్రం ప్రస్తుతం అక్కడ తీవ్ర కలకలం రేపుతోంది.

సిలికాన్ వ్యాలీలోని అనధికారిక ‘విస్పర్ నెట్‌వర్క్’ (Whisper Network) సభ్యులు తయారు చేసిన ఈ డిజిటల్ పత్రంలో 100 మందికి పైగా లైంగిక వేధింపులు, తీవ్రమైన ఆరోపణలు ఎదుర్కొంటున్న వ్యక్తుల పేర్లు ఉన్నాయి. ఇందులో ప్రముఖ టెక్, ఆర్టిఫిషియల్ ఇంటెలిజెన్స్ (AI) సంస్థలతో సంబంధం ఉన్న వారు కూడా ఉన్నారు.

చట్టపరమైన చర్యలకు వెళ్లడంలో ఉండే అధికారం/ప్రభావం వ్యత్యాసాలు, వృత్తిపరమైన కక్షసాధింపు చర్యలకు భయపడి ఈ రహస్య మార్గాన్ని రూపొందించారు. బాధిత యువ టెక్ ఉద్యోగి ఒకరు మాట్లాడుతూ.. “నేను న్యాయం కోసం పోరాడి ఓడిపోతే, ఈ నగరంలో ఉన్న ఏ ఇన్వెస్టర్ కూడా నాకు ఉద్యోగం ఇవ్వకుండా, మద్దతు తెలపకుండా నన్ను బ్లాక్‌లిస్ట్‌లో పెడతారని భయపడ్డాను” అని తన వేదనను పంచుకున్నారు. ముఖ్యంగా, ‘హాకర్ హౌస్’ అని పిలిచే కలిసి నివసించే సంస్కృతిలో హద్దులు చెరిగిపోవడం వల్లే ఇలాంటి లైంగిక వేధింపులు పెరుగుతున్నాయని తెలుస్తోంది.

ఈ పత్రంలో పేర్కొన్న కొన్ని ముఖ్యమైన సంఘటనలు టెక్ ప్రపంచాన్ని దిగ్భ్రాంతికి గురిచేశాయి. ‘Zette’ యాప్ వ్యవస్థాపకురాలు యెహాంగ్ జు (Yehong Zhu), డిసెంబర్ 2021లో శాన్ ఫ్రాన్సిస్కో హాకర్ హౌస్‌కు చెందిన ఒక మాజీ సభ్యుడిపై లైంగిక దాడి, దాడికి సంబంధించి పోలీసులకు ఫిర్యాదు చేశారు. అయితే, పోలీసుల వద్దకు వెళ్లవద్దని ఆర్గనైజర్లు తనను అడ్డుకున్నారని, నిందితుడిని బయటకు పంపే విషయమై కమిటీ ద్వారా ఓటింగ్ నిర్వహించడానికి ప్రయత్నించారని ఆమె ఆరోపించారు. కాగా, జెనెసిస్ (Genesis) సంస్థ వ్యవస్థాపకుడు జెరెమీ నిక్సన్ తరఫు న్యాయవాది మాట్లాడుతూ.. తన క్లయింట్‌కు ఈ విషయం గురించి తెలియదని, భద్రతకే ఎల్లప్పుడూ మొదటి ప్రాధాన్యత ఇస్తామని తెలిపారు.

జనవరి 2025లో ఒక మహిళకు కెటామైన్ (Ketamine) అనే డ్రగ్ ఇచ్చి లైంగిక దాడికి పాల్పడినట్లు మరో ఫిర్యాదు వచ్చింది. అయితే హాకర్ హౌస్ యాజమాన్యం ఈ సంఘటన తీవ్రతను తగ్గించి చూపించడమే కాకుండా, నిందితుడిని మళ్లీ లోపలికి అనుమతించేలా రాజీ చర్చలు జరపాలని ఒత్తిడి చేసిందని, చివరికి తననే బయటకు వెళ్ళిపోమని చెప్పారని బాధితురాలు ఆరోపించారు.

దీనికి భిన్నంగా, దక్షిణ కాలిఫోర్నియాలోని ఒక వ్యవస్థాపకుల సంఘంలో తనపై దాడి చేసిన వ్యక్తిని వెంటనే ఇంటి నుండి వెళ్లగొట్టి, తాళాలు మార్చి, పోలీసులకు ఫిర్యాదు చేసేందుకు సహాయం చేశారని మరొక మాజీ నివాసి ప్రశంసించారు. భద్రతా సలహాదారుల సాయంతో తాము సరైన నిబంధనలను రూపొందించామని ఆ సంస్థ సహ వ్యవస్థాపకుడు బ్రెట్ గోల్డ్‌స్టీన్ తెలిపారు.

చట్టపరమైన చర్యలకు వెళ్లకుండా, ఇలాంటి అంతర్గత కమిటీలు, సామాజిక రాజీలపై ఆధారపడటం బాధితులకు జరిగే పెద్ద అన్యాయమని విమర్శకులు వాదిస్తున్నారు. ఈ విషయంలో బహిరంగంగా పోరాడుతున్న యెహాంగ్ జు లాంటి వారు.. “ఈ వివాదం మాత్రమే నా పేరుతో ఉండిపోవాలని నేను కోరుకోవట్లేదు; సాధించాల్సిన కలలు నాకు ఇంకా చాలా ఉన్నాయి” అని ధైర్యంగా చెప్పారు.