టెహ్రాన్: ఇరాన్ మరియు అమెరికా మధ్య యుద్ధం పతాక స్థాయికి చేరుకున్న వేళ, ఒకవేళ భూతల దాడి (Ground Attack) కి ప్రయత్నిస్తే అమెరికా అధ్యక్షుడు డొనాల్డ్ ట్రంప్‌కు “పెద్ద ఆశ్చర్యం” ఎదురవుతుందని ఇరాన్ సైన్యం బహిరంగంగా హెచ్చరించింది.
గత ఫిబ్రవరి 28 నుండి అమెరికా మరియు ఇజ్రాయెల్ దళాలు ఇరాన్‌పై వైమానిక దాడులు జరుపుతుండగా, ప్రస్తుతం అమెరికా భూతల దాడుల సంభావ్యతపై ఆలోచిస్తున్నట్లు సమాచారం వెలువడింది. దీనికి ప్రతిస్పందనగా ఇరాన్ సైన్యం ‘తస్నిమ్’ వార్తా సంస్థ ద్వారా ఈ హెచ్చరికను జారీ చేసింది.
ఈ సందర్భంగా ఇరాన్ సైనిక వర్గాలు మాట్లాడుతూ, “ఇరాన్ గడ్డపై భూతల దాడి చేయడం అనేది మా ‘రెడ్ లైన్’ (లక్ష్మణ రేఖ). ఇప్పటివరకు శత్రువు చేసిన ప్రతి దాడికి మేము ఒక ‘సర్ప్రైజ్’ ఇచ్చాము. భూతల దాడిలో అది ఇంకా తీవ్రంగా ఉంటుంది.”
“ఉగ్రవాది ట్రంప్ ఈ విషయంలో ఏదైనా తప్పు చేస్తే, ఆయనకు ఎదురయ్యే ఆశ్చర్యం ఏమిటంటే.. ఆయన తన సైనికుల శవపేటికలను కూడా మా గడ్డ నుండి తీసుకెళ్లలేరు” అని ఇరాన్ సైన్యం ఆవేశంగా పేర్కొంది. తమ దేశంలోని ఇంధన కేంద్రాలు మరియు చమురు మౌలిక సదుపాయాలపై దాడులు జరిగితే, మధ్యప్రాచ్యంలోని మిగిలిన అన్ని దేశాల ఇంధన వ్యవస్థలను కూడా స్తంభింపజేస్తామని ఇరాన్ హెచ్చరించింది.
ఫిబ్రవరి 28న అమెరికా-ఇజ్రాయెల్ జరిపిన వైమానిక దాడుల్లో ఇరాన్ సుప్రీం లీడర్ అయతుల్లా అలీ ఖమేనీ, ఆయన కుటుంబ సభ్యులు, రక్షణ మంత్రి అమీర్ అజీజ్ నసీర్‌జాదే, రివల్యూషనరీ గార్డ్స్ కమాండర్ మొహమ్మద్ బాక్పూర్ సహా కీలక నేతలు మరణించినట్లు ఇరాన్ ధృవీకరించింది. ఈ దాడుల్లో మహిళలు, పిల్లలు సహా సుమారు 1,000 మందికి పైగా ప్రాణాలు కోల్పోయారు. “మేము కాల్పుల విరమణను కోరుకోవడం లేదు, శత్రువును పూర్తిగా నాశనం చేయడమే మా లక్ష్యం” అని అధ్యక్షుడు ట్రంప్ ఇప్పటికే ప్రకటించారు.