హార్ముజ్ జలసంధికి (Strait of Hormuz) యుద్ధనౌకలను పంపడానికి అమెరికా సిద్ధంగా ఉందని అమెరికా అధ్యక్షుడు డొనాల్డ్ ట్రంప్ తెలిపారు. ఈ కీలకమైన సముద్ర మార్గాన్ని రక్షించడానికి ఇతర దేశాలు కూడా తమ నౌకలను పంపాలని ఆయన విజ్ఞప్తి చేశారు. అయితే, రెండు పెద్ద దేశాలు ట్రంప్ విజ్ఞప్తిని తోసిపుచ్చడం ఆయనకు నిరాశను మిగిల్చింది.
ట్రంప్‌కు ‘నో’ చెప్పిన చైనా, బ్రిటన్: ప్రపంచ చమురు సరఫరాలో హార్ముజ్ జలసంధి అత్యంత కీలకం. యుద్ధ ఉద్రిక్తతల వల్ల అక్కడ భద్రతాపరమైన ఆందోళనలు నెలకొన్నాయి. ఈ ప్రాంతాన్ని రక్షించాలన్న ట్రంప్ కోరికపై చైనా, బ్రిటన్ స్పందించాయి. అయితే, ఈ ప్రాంతానికి తమ యుద్ధనౌకలను పంపే విషయంలో అవి స్పష్టత ఇవ్వలేదు, ఇది దాదాపు ఆ విజ్ఞప్తిని తిరస్కరించడమేనని నిపుణులు భావిస్తున్నారు.
చైనా స్పందన: ట్రంప్ కోరికపై అమెరికాలోని చైనా రాయబార కార్యాలయ ప్రతినిధి మాట్లాడుతూ.. చైనా వెంటనే శత్రుత్వానికి ముగింపు పలకాలని కోరుకుంటోందని, ఇంధన సరఫరాకు ఎలాంటి ఆటంకం కలగకూడదని ఆశిస్తున్నట్లు తెలిపారు. మధ్యప్రాచ్య దేశాలతో సంబంధాలను బలోపేతం చేసి శాంతిని నెలకొల్పడానికి ప్రయత్నిస్తామని చెప్పారు.
బ్రిటన్ ఏమంది? బ్రిటన్ రక్షణ మంత్రిత్వ శాఖ ప్రతినిధి మాట్లాడుతూ.. నౌకల భద్రతను నిర్ధారించడానికి తమ మిత్రదేశాలతో కలిసి వివిధ ప్రత్యామ్నాయాల గురించి చర్చిస్తున్నామని తెలిపారు. అయితే, యుద్ధనౌకలను పంపడంపై ఎటువంటి హామీ ఇవ్వలేదు.
ట్రంప్ ఏమన్నారంటే..? అంతకుముందు, హార్ముజ్ జలసంధిని సురక్షితంగా ఉంచడానికి చైనా, ఫ్రాన్స్, జపాన్, దక్షిణ కొరియా మరియు బ్రిటన్ వంటి దేశాలు అమెరికాతో చేతులు కలిపి యుద్ధనౌకలను పంపుతాయని ట్రంప్ తన ‘ట్రూత్ సోషల్’ ఖాతాలో ధీమా వ్యక్తం చేశారు. అమెరికా చర్యల తర్వాత ఇరాన్ సైనిక సామర్థ్యం దెబ్బతిన్నదని, అయితే డ్రోన్లు మరియు సముద్రపు మైన్ల వల్ల ఇంకా ముప్పు పొంచి ఉందని ఆయన పేర్కొన్నారు.