ట్రంప్ ఆరోగ్యంపై చర్చ: అమెరికా అధ్యక్షుడు డొనాల్డ్ ట్రంప్ మరోసారి వార్తల్లో నిలిచారు. అయితే ఈసారి ఆయన రాజకీయ నిర్ణయాల వల్ల కాకుండా, తన ఆరోగ్యానికి సంబంధించిన చర్చల వల్ల చర్చనీయాంశమయ్యారు. ప్రస్తుతం 79 ఏళ్ల వయసున్న ట్రంప్, అమెరికా చరిత్రలోనే రెండో అత్యంత వృద్ధ అధ్యక్షుడిగా ఉన్నారు. గతంలో డెమొక్రాటిక్ అధ్యక్షుడు జో బైడెన్ తన 82వ ఏట అధికారం నుండి తప్పుకున్న సంగతి తెలిసిందే.
ఇటీవలి కాలంలో ట్రంప్ చేతులపై కొన్ని నీలి రంగు మచ్చలు, గాయాలు బహిరంగంగా కనిపించడం అందరి దృష్టిని ఆకర్షించింది. కొన్నిసార్లు ఈ మచ్చలను మేకప్‌తో కప్పి ఉంచడం గమనించిన జనం, ఆయన ఆరోగ్యంపై రకరకాల ఊహాగానాలు మొదలుపెట్టారు. దీంతో సోషల్ మీడియా మరియు అంతర్జాతీయ మీడియాలో ట్రంప్ ఆరోగ్యంపై చర్చలు జోరందుకున్నాయి.
ఈ చర్చలపై స్పందించిన ట్రంప్, తన చేతులపై ఉన్న గాయాలు ఎక్కడో పడిపోవడం వల్ల గానీ లేదా తీవ్రమైన ఆరోగ్య సమస్యల వల్ల గానీ రాలేదని స్పష్టం చేశారు. తాను ప్రతిరోజూ రక్తం పలుచబడటం కోసం ఆస్పిరిన్ (Aspirin) వాడుతున్నానని, దాని వల్లే అప్పుడప్పుడు ఇలాంటి మచ్చలు కనిపిస్తాయని ఆయన వివరించారు.
‘ది వాల్ స్ట్రీట్ జర్నల్’ కు ఇచ్చిన ఇంటర్వ్యూలో ట్రంప్ మాట్లాడుతూ.. “నేను పూర్తిగా ఆరోగ్యంగా ఉన్నాను” అని ప్రకటించారు. తన ఆరోగ్యం గురించి పదే పదే అడుగుతున్న ప్రశ్నలపై అసహనం వ్యక్తం చేస్తూ, “25వ సారి నా ఆరోగ్యం గురించి మాట్లాడుతున్నాం” అని వ్యంగ్యంగా అన్నారు. అధ్యక్షుడిగా బాధ్యతలు నిర్వహించడానికి తాను శారీరకంగా, మానసికంగా దృఢంగా ఉన్నానని స్పష్టం చేశారు.
చేతులపై గాయాలకు మరో కారణాన్ని కూడా ట్రంప్ వెల్లడించారు. ఒక బహిరంగ సభలో హై-ఫైవ్ (High-five) ఇస్తున్న సమయంలో అటార్నీ జనరల్ పామ్ బోండీ ధరించిన ఉంగరం తన చేతికి తగిలి గాయమైందని చెప్పారు. నొప్పిగా ఉన్నప్పుడు మేకప్ లేదా బ్యాండేజ్ వాడుతున్నానని కూడా ఆయన ఒప్పుకున్నారు.
మరోవైపు, కొన్ని సమావేశాల్లో ట్రంప్ కళ్లు మూసుకుని ఉన్న దృశ్యాలు వైరల్ అయ్యాయి. దీనిపై “ఆయన సమావేశంలోనే నిద్రపోయారు” అనే ఆరోపణలు వచ్చాయి. అయితే ట్రంప్ వీటిని కొట్టిపారేశారు. “నాకు అంతగా నిద్ర రాదు. కొన్నిసార్లు కళ్లు మూసుకోవడం అనేది విశ్రాంతిలో భాగం మాత్రమే” అని పేర్కొన్నారు. గతంలో మాజీ అధ్యక్షుడు జో బైడెన్‌ను ‘స్లీపీ’ (Sleepy) అని ఎగతాళి చేసిన ట్రంప్, ఇప్పుడు అదే తరహా విమర్శలు ఎదుర్కోవడం గమనార్హం.