కేంద్ర సాయుధ పోలీస్ బలగాలలో (BSF, CRPF, ITBP, CISF, SSB) నాన్-ఫంక్షనల్ ఫైనాన్షియల్ అప్‌గ్రేడేషన్ (NFU) మరియు ఐపీఎస్ అధికారుల డెప్యుటేషన్‌కు సంబంధించిన వివాదం మరోసారి ముదిరింది. ఈ అంశాలపై మే 2025 లో సుప్రీంకోర్టు స్పష్టమైన ఆదేశాలు ఇచ్చినప్పటికీ, ప్రభుత్వం వాటిని అమలు చేయకపోవడంతో అధికారులు కోర్టు ధిక్కరణ పిటిషన్ దాఖలు చేశారు.
వివాదం ఏమిటి? 2006లో 6వ వేతన సంఘం ‘ఎన్‌ఎఫ్‌యూ’ను ప్రతిపాదించింది. దీని ఉద్దేశం ఏంటంటే.. ఒకే బ్యాచ్‌కు చెందిన ఐఏఎస్ అధికారికి ప్రమోషన్ వచ్చి పై గ్రేడ్ వేతనం అందుకుంటున్నప్పుడు, అదే బ్యాచ్‌లోని ఇతర గ్రూప్-A అధికారులకు ప్రమోషన్ రాకపోయినా, వారికి అదే స్థాయి వేతనాన్ని (Financial Upgradation) అందించాలి. దీనివల్ల కెరీర్‌లో ఎదురయ్యే ఆర్థిక అసమానతలు తొలగిపోతాయి. ప్రభుత్వం దీనిని 52 రకాల సర్వీసుల్లో అమలు చేసినా, దేశ రక్షణలో కీలకమైన CAPF బలగాలను మాత్రం మినహాయించింది.
కోర్టు తీర్పు – ప్రభుత్వ వైఖరి: సుమారు 14 ఏళ్ల సుదీర్ఘ న్యాయ పోరాటం తర్వాత, మే 23, 2025న సుప్రీంకోర్టు CAPF అధికారులకు అనుకూలంగా తీర్పునిచ్చింది. వీరు కూడా ‘ఆర్గనైజ్డ్ గ్రూప్-A సర్వీస్’ కిందకే వస్తారని, వీరికి ఎన్‌ఎఫ్‌యూ ప్రయోజనాలు కల్పించాలని స్పష్టం చేసింది. అయితే, ప్రభుత్వం ఈ తీర్పును అమలు చేయకుండా కాలయాపన చేస్తోందని, సుప్రీంకోర్టు ఆదేశాలను నీరుగార్చేందుకు కొత్త చట్టాన్ని తెచ్చే ప్రయత్నం చేస్తోందని రిటైర్డ్ అధికారులు ఆరోపిస్తున్నారు.
నైపుణ్యం ఉన్నా నాయకత్వ లేమి: CAPF అధికారులు సరిహద్దు నిర్వహణ (Border Management) మరియు తీవ్రవాద వ్యతిరేక చర్యల్లో అపారమైన అనుభవం, నైపుణ్యం (Domain Expertise) కలిగి ఉన్నారు. అయినప్పటికీ, ఐజీ (IG), ఏడీజీ (ADG) వంటి కీలక పదవుల్లో ఐపీఎస్ అధికారులను నియమించడం వల్ల క్షేత్రస్థాయి పరిస్థితులపై అవగాహన లోపిస్తోందని, ఇది బలగాల పనితీరుపై ప్రభావం చూపుతోందని వారు ఆవేదన వ్యక్తం చేస్తున్నారు.