న్యూఢిల్లీ/టెహ్రాన్: అగ్రరాజ్యం అమెరికా మరియు ఇరాన్ మధ్య రెండు వారాల కాల్పుల విరమణ (సీజ్‌ఫైర్) అమల్లోకి వచ్చినప్పటికీ, ఇరాన్‌లోని భారతీయ పౌరుల విషయంలో కేంద్ర ప్రభుత్వం ఎటువంటి రిస్క్ తీసుకోవడం లేదు. బుధవారం కేంద్రం అత్యవసరంగా కొత్త ట్రావెల్ అడ్వైజరీని జారీ చేస్తూ, ఇరాన్‌లో ఉన్న భారతీయులు “వీలైనంత త్వరగా” ఆ దేశాన్ని విడిచి రావాలని ఆదేశించింది. అక్కడ ఉన్న ప్రతి క్షణం ప్రమాదకరమేనన్న సంకేతాలను ప్రభుత్వం ఇచ్చింది.
సరిహద్దులకు వెళ్తే ప్రమాదం.. రాయబార కార్యాలయం హెచ్చరిక!
భారత రాయబార కార్యాలయం విడుదల చేసిన మార్గదర్శకాల ప్రకారం.. ఇరాన్ నుండి నిష్క్రమించే వారు ప్రభుత్వం సూచించిన మార్గాలను మాత్రమే ఎంచుకోవాలి. “ముందస్తు అనుమతి లేకుండా అంతర్జాతీయ సరిహద్దులను దాటడానికి ప్రయత్నించవద్దు” అని భారతీయులను కోరింది.
సహాయం కోసం అత్యవసర నంబర్లు: భారత ప్రభుత్వం కింది హెల్ప్‌లైన్ నంబర్లను అందుబాటులోకి తెచ్చింది:
- ఫోన్ నంబర్లు: +989128109115, +989128109109, +989128109102, +989932179359
- ఈమెయిల్: cons.tehran@mea.gov.in
ట్రంప్ హెచ్చరికలు.. వణికిపోయిన ప్రపంచం!
ఫిబ్రవరి 28, 2026న ప్రారంభమైన ఈ భీకర యుద్ధం ఇప్పుడు ఒక కీలక దశకు చేరుకుంది. అమెరికా అధ్యక్షుడు డొనాల్డ్ ట్రంప్ గతంలో ఇచ్చిన డెడ్‌లైన్ ప్రపంచవ్యాప్తంగా భయాందోళనలు రేకెత్తించింది. “హార్ముజ్ జలసంధిని తెరవకపోతే, ఒక నాగరికతే అంతమవుతుంది” అంటూ ట్రంప్ చేసిన వ్యాఖ్యలు యుద్ధం ఎంత తీవ్రంగా ఉందో సూచిస్తున్నాయి. మార్చి 21 నుండి ఇప్పటివరకు ట్రంప్ సుమారు 6 సార్లు ఇరాన్‌కు గడువు ఇస్తూ వచ్చారు. చివరకు ఏప్రిల్ 7 డెడ్‌లైన్ ముగియడానికి కొద్దిసేపటి ముందు రెండు వారాల కాల్పుల విరమణకు అంగీకారం కుదిరింది.