తమిళనాడు అప్పులు: తమిళనాడు ముఖ్యమంత్రిగా ప్రమాణ స్వీకారం చేసిన తర్వాత తన మొదటి ప్రసంగంలో టీవీకే (TVK) అధినేత సి. జోసెఫ్ విజయ్ మాజీ ముఖ్యమంత్రి ఎం.కె. స్టాలిన్ మరియు డీఎంకే ప్రభుత్వంపై తీవ్ర స్థాయిలో విరుచుకుపడ్డారు. డీఎంకే ప్రభుత్వం రూ. 10 లక్షల కోట్ల భారీ అప్పుల భారాన్ని మిగిల్చిందని, రాష్ట్ర ఖజానాను ఖాళీ చేసిందని ఆయన ఆరోపించారు.
ప్రమాణ స్వీకారం అనంతరం సభను ఉద్దేశించి ముఖ్యమంత్రి మాట్లాడుతూ.. రాష్ట్ర ఆర్థిక పరిస్థితి ఊహించిన దానికంటే దారుణంగా ఉందని, పారదర్శకత కోసం తమిళనాడు ఆర్థిక పరిస్థితిపై ‘శ్వేతపత్రం’ (White Paper) విడుదల చేస్తామని సూచించారు.
“మన తమిళనాడు ప్రభుత్వాన్ని ఏ పరిస్థితిలో వదిలిపెట్టారో నేను స్వయంగా చూశాను,” అని విజయ్ అన్నారు. “గత ప్రభుత్వం పది లక్షల కోట్ల రూపాయల కంటే ఎక్కువ అప్పులు చేసి వెళ్ళింది; వారు పదవి నుండి తప్పుకోవడానికి ముందే ఖజానా పూర్తిగా ఖాళీ అయింది” అని ఆయన పేర్కొన్నారు.
ఈ వ్యాఖ్యలపై మాజీ ముఖ్యమంత్రి ఎం.కె. స్టాలిన్ ఘాటుగా స్పందించారు. రాష్ట్ర ఖజానా ఖాళీగా ఉందన్న ఆరోపణలను ఆయన తోసిపుచ్చారు. “ప్రభుత్వం వద్ద డబ్బు లేదని ఇప్పుడే చెప్పడం ప్రారంభించకండి. డబ్బు ఉంది. కావలసింది ప్రజలకు ఇవ్వాలనే సంకల్పం, పరిపాలించే సామర్థ్యం” అని స్టాలిన్ ‘ఎక్స్’ (X) లో పోస్ట్ చేశారు.
ఈ పరిస్థితి 2021 నాటి పరిణామాలను గుర్తు చేస్తోంది. అప్పట్లో డీఎంకే అధికారంలోకి వచ్చిన వెంటనే ఆర్థిక మంత్రి పీటీఆర్ పళనివేల్ త్యాగరాజన్ ఒక శ్వేతపత్రాన్ని విడుదల చేశారు. పదేళ్ల ఏఐఏడీఎంకే పాలన తర్వాత తమిళనాడు ఆర్థిక పరిస్థితి “అస్తవ్యస్తంగా” ఉందని ఆయన వర్ణించారు. ఇప్పుడు ఐదేళ్ల తర్వాత, విజయ్ అదే తరహాలో శ్వేతపత్రానికి సిద్ధమవుతూ.. రాష్ట్రం “గడ్డు స్థితి”లో ఉండటానికి డీఎంకే కారణమని నిందిస్తున్నారు.
తమిళనాడు అప్పుల గురించి గణాంకాలు ఏం చెబుతున్నాయి?
రిజర్వ్ బ్యాంక్ ఆఫ్ ఇండియా (ఆర్బీఐ) విడుదల చేసిన గణాంకాల ప్రకారం, ఆర్థిక సంవత్సరం 2025 (FY25) ముగిసే నాటికి తమిళనాడు మొత్తం అప్పులు రూ. 9.56 లక్షల కోట్లుగా ఉన్నాయి. ఇది భారతీయ రాష్ట్రాల్లోనే అత్యధికం. అదే సమయంలో, దేశంలోనే వేగంగా వృద్ధి చెందుతున్న రాష్ట్రంగా కూడా తమిళనాడు ఉంది. పాత జీడీపీ సిరీస్ ప్రకారం ఆర్థిక సంవత్సరం 2025లో 11.2%, 2026లో 10.8% వృద్ధి రేటును నమోదు చేసింది.
వేగంగా వృద్ధి చెందుతున్న ఆర్థిక వ్యవస్థలు సాధారణంగా అప్పులను తిరిగి చెల్లించే సామర్థ్యాన్ని కలిగి ఉంటాయి. రాష్ట్ర అప్పు-జీఎస్డీపీ నిష్పత్తి (Debt-to-GSDP ratio) ఆర్థిక సంవత్సరం 2025లో 30.6% గా ఉంది. ఇది 2022 నాటి 32% కంటే తక్కువగా ఉందని ఆర్బీఐ డేటా తెలిపింది.
ముఖ్యమంత్రి విజయ్ ప్రస్తావించిన రూ. 10 లక్షల కోట్ల అప్పు కేవలం గత డీఎంకే ప్రభుత్వం వల్లనే రాలేదని, గత కొన్ని దశాబ్దాలుగా వివిధ ప్రభుత్వాల హయాంలో ఈ అప్పు క్రమంగా పెరుగుతూ వచ్చిందని ‘ఇండియన్ ఎక్స్ప్రెస్’ కథనం పేర్కొంది. కోవిడ్-19 సమయంలో ఈ అప్పుల భారం మరింత వేగంగా పెరిగినట్లు ఫైనాన్స్ కమిషన్ నివేదిక వెల్లడించింది.
భవిష్యత్తు సవాళ్లు
తమిళనాడు ఆదాయంలో దాదాపు 62% కేవలం జీతాలు, పెన్షన్లు మరియు వడ్డీ చెల్లింపులకే ఖర్చవుతోంది. దీనివల్ల అభివృద్ధి పనులకు నిధుల కొరత ఏర్పడుతోంది. ఈ క్రమంలో, ప్రతి రెండు నెలలకు 200 యూనిట్ల ఉచిత విద్యుత్ ఇస్తామన్న విజయ్ హామీ ప్రభుత్వంపై మరింత ఆర్థిక భారాన్ని పెంచే అవకాశం ఉంది. అంచనాల ప్రకారం, విజయ్ తన మేనిఫెస్టోలో ఇచ్చిన అన్ని సంక్షేమ హామీలను అమలు చేస్తే, వార్షిక సంక్షేమ ఖర్చు రూ. 1 లక్ష కోట్లకు చేరుకోవచ్చు.
మరోవైపు, 2026 నాటికి తమిళనాడు జనాభాలో 15% కంటే ఎక్కువ మంది 60 ఏళ్లు పైబడిన వారు ఉంటారు (Ageing population). దీనివల్ల పెన్షన్లు మరియు ఆరోగ్య సంరక్షణపై ఖర్చులు భవిష్యత్తులో మరింత పెరగనున్నాయి.