బీడ్/అంబాజోగాయ్(మహారాష్ట్ర): ఒక యువ డాక్టర్ ఉజ్వల భవిష్యత్తు చిగురులోనే వాడిపోయింది. తోటి ఉద్యోగి సోదరి వేధింపులు తట్టుకోలేక, పరువు పోతుందన్న భయంతో 29 ఏళ్ల డాక్టర్ మందార్ ఉమేష్ దాభడే బలవన్మరణానికి పాల్పడ్డారు. అయితే, ఆయన మరణం వెనుక ఉన్న భయంకరమైన వాస్తవాలు ఒక సినిమా సీన్ను తలపించేలా బయటపడ్డాయి. ఆత్మహత్యకు ముందు తన అన్నకు పంపిన ఒక ‘డిజిటల్ పాస్వర్డ్’ ఈ కేసులో అసలు నిందితురాలిని బోనులో నిలబెట్టింది.
ఏం జరిగిందంటే?
బీడ్ జిల్లా అంబాజోగాయ్లోని స్వరాతి మెడికల్ కాలేజీలో పీజీ చదువుతున్న డాక్టర్ మందార్.. ఏప్రిల్ 6, 2026 తెల్లవారుజామున తన అద్దె ఇంట్లో ఉరివేసుకుని ఆత్మహత్య చేసుకున్నారు. తలుపులు తీయకపోవడంతో అనుమానం వచ్చిన ఇరుగుపొరుగు వారు పోలీసులకు సమాచారం అందించారు. తలుపులు పగులగొట్టి చూడగా డాక్టర్ శవమై కనిపించారు.
అన్నకు పంపిన ఆ ‘పాస్వర్డ్’ వెనుక రహస్యం!
మందార్ ఆత్మహత్యకు కొద్ది నిమిషాల ముందు తన అన్న లౌకిక్ దాభడే మొబైల్కు తన ఫోన్ ‘పాస్వర్డ్’ మెసేజ్ చేశాడు. తమ్ముడి అంత్యక్రియలు ముగిసిన తర్వాత, భారమైన హృదయంతో లౌకిక్ ఆ పాస్వర్డ్ సాయంతో ఫోన్ ఓపెన్ చేయగా.. అందులో ఉన్న ‘సూసైడ్ నోట్’ చూసి షాక్కు గురయ్యారు.
వంచన.. వేధింపులు.. బ్లాక్మెయిల్!
ఫోన్లో ఉన్న వివరాల ప్రకారం.. మందార్కు తనతో పనిచేసే ఒక సహోద్యోగి సోదరి (విడాకులు తీసుకున్న మహిళ) తో పరిచయం ఏర్పడింది. ఆ పరిచయాన్ని ఆసరాగా చేసుకున్న ఆమె:
- అశ్లీల వీడియోలు: మందార్కు తన అభ్యంతరకర వీడియోలు, చాట్స్ పంపి శారీరక సంబంధం కోసం ఒత్తిడి తెచ్చేది.
- పెళ్లి చేసుకోవాలని బెదిరింపు: “నేను గర్భవతిని.. నన్ను పెళ్లి చేసుకోకపోతే విషం తాగి చనిపోతాను, సూసైడ్ నోట్లో నీ పేరు రాస్తాను” అని నిరంతరం బ్లాక్మెయిల్ చేసేది.
- మానసిక వేధన: లేని గర్భాన్ని సాకుగా చూపి మందార్ను మానసిక క్షోభకు గురిచేసింది. సమాజంలో పరువు పోతుందన్న భయంతో, ఆ వేధింపులు భరించలేక మందార్ తన తండ్రికి, అన్నకు సారీ చెబుతూ ప్రాణాలు తీసుకున్నారు.
కేసు నమోదు – విచారణ
మందార్ అన్న లౌకిక్ ఇచ్చిన ఫిర్యాదుతో అంబాజోగాయ్ పోలీసులు సదరు మహిళపై భారతీయ న్యాయ సంహిత (BNS) సెక్షన్ 108 కింద ఆత్మహత్యకు ప్రేరేపించినట్లు కేసు నమోదు చేశారు. ఈ హృదయ విదారక ఘటన స్థానిక వైద్య వర్గాల్లో తీవ్ర చర్చనీయాంశంగా మారింది. ఆ పాస్వర్డ్ పంపకపోయి ఉంటే, ఒక యువ డాక్టర్ మరణానికి కారణమైన కిరాతకురాలు బయటపడేదే కాదని పోలీసులు భావిస్తున్నారు.