ఆంధ్రప్రదేశ్లోని ప్రకాశం జిల్లా మార్కాపురం పరిధిలోని ఎర్రగొండపాలెం, ఇందిరా నగర్కు చెందిన 21 ఏళ్ల ఆంజనేయులు తల్లిదండ్రులు చిన్నప్పుడే చనిపోయారు. తన అక్క వద్ద పెరుగుతున్న ఆంజనేయులుకు వివాహం చేయాలని నిర్ణయించుకున్నారు. మే 13న పెళ్లి సంబంధం చూసేందుకు వెళ్లిన ఆంజనేయులు, తిరిగి వస్తుండగా ముఖ్యమైన పని ఉందని చెప్పి మధ్యలోనే వెళ్లిపోయాడు. రెండు రోజులు గడిచినా ఇంటికి రాకపోవడంతో, ఆందోళన చెందిన కుటుంబ సభ్యులు పోలీసులకు ఫిర్యాదు చేశారు. పోలీసులు కేసు నమోదు చేసి విచారణ చేపట్టగా, ఆంజనేయులు ఫోన్ చివరిసారిగా పొట్టిరెడ్డిపల్లి ప్రాంతంలో ఉన్నట్లు తెలిసింది. పోలీసులు ఆ ప్రాంతంలో విచారించగా, అక్కడి వెంకట్రామన్ మరియు రమణ దంపతుల 15 ఏళ్ల కూతురితో ఆంజనేయులు ప్రేమలో ఉన్నట్లు బయటపడింది.
తల్లిదండ్రులకు దొరికిపోయిన ప్రేమికులు: పోలీసుల విచారణలో షాకింగ్ విషయాలు వెలుగులోకి వచ్చాయి. మే 13న పెళ్లి సంబంధం చూసి వస్తున్న ఆంజనేయులుకు ఆ బాలిక ఫోన్ చేసి, తల్లిదండ్రులు ఇంట్లో లేరని చెప్పి ఇంటికి పిలిచింది. రాత్రి 10:30 గంటల సమయంలో ఆంజనేయులు బాలిక ఇంటికి వెళ్లాడు. ఆ సమయంలో అనుకోకుండా ఇంటికి వచ్చిన తల్లిదండ్రులు వెంకట్రామన్ మరియు రమణ, వారిద్దరిని అభ్యంతరకర స్థితిలో చూసి ఆగ్రహానికి గురయ్యారు.
ముక్కలుగా నరికి హత్య: తన కూతురిని ఆ స్థితిలో చూసిన తండ్రి వెంకట్రామన్, కోపంతో అక్కడే ఉన్న ఇనుప రాడ్ తీసుకుని ఆంజనేయులుపై దాడి చేశాడు. ఈ దాడిలో ఆంజనేయులు అక్కడికక్కడే మరణించాడు. నేరాన్ని కప్పిపుచ్చుకోవడానికి, వెంకట్రామన్ ఆంజనేయులు మృతదేహాన్ని పందులను కోసే కత్తితో ముక్కలు ముక్కలుగా నరికి, సమీపంలోని 100 అడుగుల లోతైన బావిలో పడేశాడు. నిందితులైన వెంకట్రామన్, అతని భార్యను పోలీసులు అరెస్టు చేశారు. మృతదేహాన్ని వెలికితీసేందుకు ప్రయత్నాలు కొనసాగుతున్నాయి.