“రోజూ తెల్లవారుజామున 5 గంటలకే పరుగు ప్రాక్టీస్ కోసం వెళ్ళేవాడు. ఇంట్లో ఎప్పుడూ చదువుకుంటూనే ఉండేవాడు. ‘అమ్మా, ఈసారి కచ్చితంగా పోలీస్ అవుతాను, గెలిచి వస్తాను’ అనేవాడు. నా కొడుకు చాలా తెలివైనోడు, నా పులి లాంటి బిడ్డ వెళ్ళిపోయాడు” అంటూ దీపక్ తల్లి జయశ్రీ వావ్లే కన్నీరుమున్నీరయ్యారు.
మహారాష్ట్ర బీడ్ జిల్లా పర్లీకి చెందిన దీపక్ భాస్కర్ వావ్లే అనే యువకుడు పోలీస్ రిక్రూట్‌మెంట్ ప్రక్రియలో భాగంగా మైదాన పరీక్షలు (Physical Test) జరుగుతుండగా మరణించాడు.
ఏం జరిగింది? బీడ్ జిల్లా పోలీస్ దళంలో 174 పోస్టుల భర్తీ ప్రక్రియ ఫిబ్రవరి 11న ప్రారంభమైంది. బుధవారం తెల్లవారుజామున 5 గంటల నుండే బీడ్ పోలీస్ హెడ్ క్వార్టర్స్ మైదానంలో ఈ ప్రక్రియ మొదలైంది. దీపక్ కూడా ఇందులో పాల్గొన్నాడు. మధ్యాహ్నం 12:30 గంటల ప్రాంతంలో 1600 మీటర్ల పరుగు పూర్తి చేసిన తర్వాత దీపక్ ఒక్కసారిగా కళ్లు తిరిగి కింద పడిపోయాడు. అక్కడ ఉన్న పోలీసులు వెంటనే అతడిని జిల్లా ఆసుపత్రికి తరలించారు. అయితే, అప్పటికే అతను మరణించినట్లు వైద్యులు ప్రకటించారు.
కుటుంబ నేపథ్యం: దీపక్ కుటుంబం పర్లీ తాలూకా మాండఖేల్ గ్రామంలో నివసిస్తోంది. వీరికి సొంత భూమి లేదు. తండ్రి ట్రాక్టర్ డ్రైవర్‌గా పనిచేస్తుండగా, తల్లి మరియు సోదరుడు కూలీ పనులకు వెళ్తారు. దీపక్ గత కొన్ని ఏళ్లుగా పోలీస్ కావాలనే కలతో కష్టపడుతున్నాడు. అతని మరణంతో ఆ కుటుంబంపై పెద్ద దుఃఖం వచ్చి పడింది.
పోలీసుల వివరణ: బీడ్ ఎస్పీ కార్యాలయం విడుదల చేసిన ప్రకటన ప్రకారం.. దీపక్ పరుగు పూర్తి చేసిన తర్వాత విశ్రాంతి తీసుకున్నాడు. అనంతరం మెడికల్ రూమ్ వైపు నడుచుకుంటూ వెళ్తుండగా పడిపోయాడు. వైద్య బృందం అతనికి ప్రాథమిక చికిత్స అందించి, పల్స్ రేటు తగ్గుతుండటంతో అంబులెన్స్‌లో ఆసుపత్రికి పంపారు. పోలీసులు దీనిని ఆకస్మిక మరణంగా (Accidental Death) నమోదు చేసి దర్యాప్తు చేస్తున్నారు.