పాకిస్థాన్లోని పంజాబ్ ప్రావిన్స్లో జరిగిన ఒక హృదయ విదారక ఘటన యావత్ దేశాన్ని దిగ్భ్రాంతికి గురిచేసింది. 18 ఏళ్ల యువతి మరణం ఇప్పుడు మహిళా భద్రత, న్యాయ వ్యవస్థపై తీవ్ర చర్చకు దారితీసింది.
ఏం జరిగింది? బాధిత యువతి ఒక ఇంట్లో పనిమనిషిగా పనిచేస్తోంది. తన యజమాని కుమారుడు, ఒక డ్రైవర్ కలిసి గత కొన్ని నెలలుగా ఆమెపై పదేపదే అత్యాచారానికి పాల్పడ్డారని ఆమె పోలీసులకు ఇచ్చిన స్టేట్మెంట్లో పేర్కొంది. ఈ విషయాన్ని బయటకు రాకుండా అణచివేసేందుకు పలువురు ప్రభావశీల వ్యక్తులు ప్రయత్నించారని కూడా ఆమె ఆరోపించింది.
అబార్షన్ వికటించి.. నిందితులు బలవంతంగా ఆమెకు గర్భవిచ్ఛిత్తి (అబార్షన్) మందులు ఇప్పించడంతో ఆమె ఆరోగ్యం క్షీణించింది. మొదట రాయ్విండ్లోని ఒక క్లినిక్కు తీసుకెళ్లగా, అక్కడ పరీక్షించిన వైద్యులు పరిస్థితి విషమంగా ఉందని చెప్పారు. కడుపులో ఉన్న 4-5 నెలల పిండం మరణించిందని గుర్తించారు. ఆ తర్వాత ఆమెను లాహోర్లోని ప్రభుత్వ ఆసుపత్రికి తరలించగా, అక్కడ చికిత్స పొందుతూ ఆపరేషన్ సమయంలో ఆమె మరణించింది.
కొత్త మలుపు తిరిగిన కేసు: ప్రారంభంలో యువతి ఇచ్చిన వాంగ్మూలం ఆధారంగా యజమాని కుమారుడు, డ్రైవర్, మరియు యజమానిపై పోలీసులు కేసులు నమోదు చేశారు. ఆమె మరణం తర్వాత, ఈ కేసులో ‘హత్య’కు సంబంధించిన సెక్షన్లను కూడా చేర్చారు. పోలీసులు డ్రైవర్ను అరెస్టు చేయగా, మిగిలిన నిందితులు కోర్టు నుండి బెయిల్ పొందారు. ప్రస్తుతం కేసు విచారణ కొనసాగుతోంది.
మహిళా భద్రతపై ప్రశ్నలు: పాకిస్థాన్లో మహిళలపై పెరుగుతున్న నేరాలు ఆందోళన కలిగిస్తున్నాయి. బాధితులకు సత్వర న్యాయం జరగాలని, నిందితులపై పారదర్శకంగా కఠిన చర్యలు తీసుకోవాలని మహిళా హక్కుల సంఘాలు డిమాండ్ చేస్తున్నాయి. ఇటువంటి సంఘటనలు కేవలం చట్టం వైఫల్యం మాత్రమే కాదు, సమాజంలో మహిళల భద్రతకు సంబంధించి తీవ్రమైన హెచ్చరిక అని సామాజిక కార్యకర్తలు ఆవేదన వ్యక్తం చేస్తున్నారు.