న్యూఢిల్లీ/కోల్కతా: పశ్చిమ బెంగాల్లో ఎన్నికల వేడి తారాస్థాయికి చేరింది. తృణమూల్ కాంగ్రెస్ మరియు బీజేపీ మధ్య పోరు నువ్వా-నేనా అన్నట్లు సాగుతోంది. ఈ క్రమంలో కేంద్ర హోంమంత్రి అమిత్ షా చేసిన వ్యాఖ్యలు కొత్త వివాదానికి తెరలేపాయి. ఎన్నికల ర్యాలీలో అమిత్ షా ముఖ్యమంత్రి మమతా బెనర్జీని ఉద్దేశించి “ఏయ్ దీదీ.. కళ్లు, చెవులు తెరిచి విను…” అని అనడాన్ని టీఎంసీ తీవ్రంగా తప్పుబడుతోంది.
అమిత్ షా ఏమన్నారు? తృణమూల్ కాంగ్రెస్ సోషల్ మీడియాలో 6 సెకన్ల వీడియో క్లిప్ను పోస్ట్ చేసింది. అందులో అమిత్ షా మమతా బెనర్జీని ఉద్దేశించి “ఏయ్ దీదీ.. (ऐ दीदी)” అని సంబోధించారు. దీనిపై టీఎంసీ మద్దతుదారులు స్పందిస్తూ.. “నాడు ‘ఓ దీదీ’ (మోదీ వ్యాఖ్యలు).. నేడు ‘ఏయ్ దీదీ’.. ముఖాలు మారినా మహిళల పట్ల వారికున్న చులకన భావం మాత్రం మారలేదు” అని మండిపడ్డారు. బెంగాల్ ఆడబిడ్డ ఇటువంటి వీధి వ్యాఖ్యలకు భయపడదని స్పష్టం చేశారు.
టీఎంసీ నేతల ఘాటు విమర్శలు: టీఎంసీ మహిళా నాయకురాలు ఒకరు స్పందిస్తూ.. “ఒక హోంమంత్రి పదవికి అమిత్ షా అనర్హుడు. మూడు సార్లు ఎన్నికైన ఒక మహిళా ముఖ్యమంత్రికి ఇవ్వాల్సిన కనీస గౌరవం ఆయనకు తెలియదు. 2021లో ప్రధాని మోదీ ‘దీదీ ఓ దీదీ’ అని ఎగతాళి చేస్తే, ఇప్పుడు అమిత్ షా ‘ఏయ్ దీదీ’ అంటున్నారు. ఇది కేవలం ఒక వ్యక్తి వైఫల్యం కాదు, ఇది ఆ పార్టీలోని పురుషాహంకార సంస్కృతి” అని ధ్వజమెత్తారు.
టీఎంసీ తన ‘ఎక్స్’ (X) ఖాతాలో బీజేపీ నేతల పాత వ్యాఖ్యలను కూడా గుర్తు చేసింది:
- ప్రధాని మోదీ – “దీదీ ఓ దీదీ” అని ఎగతాళి చేయడం.
- గిరిరాజ్ సింగ్ – మమతా బెనర్జీ నడకను “తుమ్కా” అంటూ వెక్కిరించడం.
- అభిజిత్ గంగోపాధ్యాయ – ఆమె “ధర ఎంత?” అని నీచంగా అడగడం.
“ముగ్గురు ముఖ్యమంత్రి పట్ల వీరి ప్రవర్తన ఇలా ఉంటే.. రేపు వీరు అధికారంలోకి వస్తే మీ తల్లి, సోదరి, కుమార్తె పరిస్థితి ఏంటో ఆలోచించండి.. బాధ్యతాయుతంగా ఓటు వేయండి” అని టీఎంసీ పిలుపునిచ్చింది.
మే 4న సమాధానం చెబుతాం: రాజ్యసభ ఎంపీ సాగరికా ఘోష్ స్పందిస్తూ.. “నారీ శక్తి గురించి మాట్లాడే బీజేపీ అసలు రూపం ఇదే. సీనియర్ మహిళా నాయకురాలిని బహిరంగంగా అవమానిస్తున్నారు” అని విమర్శించారు. మరో నేత మాట్లాడుతూ.. “కాన్వాయ్, జెడ్ ప్లస్ సెక్యూరిటీ తీసేస్తే అమిత్ షా ఎవరు? మహిళా సీఎంను అగౌరవపరిచే వ్యక్తా మన దేశాన్ని, బెంగాల్ను పాలించేది? దీనికి బెంగాల్ ప్రజలు మే 4న తమ ఓటు ద్వారా తగిన సమాధానం చెబుతారు” అని హెచ్చరించారు.
బెంగాల్ అసెంబ్లీ ఎన్నికల మొదటి విడత ప్రచారం ముగిసిన తరుణంలో, ఈ ‘గౌరవ’ పోరాటం ఓటర్ల తీర్పును ఏ విధంగా ప్రభావితం చేస్తుందో వేచి చూడాలి.