దుబాయ్: ఒకప్పుడు సొంతూరిలో ఉద్యోగం దొరకని చాలా మంది యూఏఈ అందులోనూ ముఖ్యంగా దుబాయ్కే ఉద్యోగాల కోసం వెళ్లేవారు.
అక్కడికి వెళ్తే ఖచ్చితంగా ఉద్యోగం లభిస్తుందనే నమ్మకమే అందుకు కారణం. కానీ, ఇప్పుడు అక్కడ పరిస్థితులు దారుణంగా మారాయట. వేలాది మంది వలస కార్మికులు యూఏఈలోనే ఉద్యోగాలు లేక అల్లాడిపోతున్నారు. దీనికి సంబంధించిన వివరాలను ఇప్పుడు చూద్దాం.
భారతదేశంలో, ముఖ్యంగా దక్షిణాది రాష్ట్రాల నుండి లక్షలాది మంది దుబాయ్కి ఉద్యోగాల కోసం వెళ్లడం ఒక అలవాటుగా మార్చుకున్నారు. అక్కడికి వెళ్తే ఎలాగోలా ఉద్యోగం దొరుకుతుందని.. కొన్ని ఏళ్లు కష్టపడినా మంచి డబ్బు పొదుపు చేసుకుని ఇండియా తిరిగి వచ్చేయొచ్చని.. ఆ తర్వాత ప్రశాంతంగా జీవించవచ్చనేదే వారి ఆశ!
ఉద్యోగాలు దొరకడం లేదు: కానీ, ఇప్పుడు యూఏఈలో కూడా విదేశీయులకు మునుపటిలా సులభంగా ఉద్యోగాలు దొరకడం లేదట. వేలాది మంది వలస కార్మికులకు ఉపాధి పొందడమే ఒక పెద్ద సవాలుగా మారుతోందని సమాచారం అందుతోంది. అమెరికా మరియు ఇరాన్ మధ్య నెలకొన్న వివాదం గల్ఫ్ దేశాలకు కూడా పాకడంతో, దుబాయ్లో ఉపాధి అవకాశాలు తగ్గిపోయాయి. ఒకవేళ ఉద్యోగం దొరికినప్పటికీ, జీతాలు గణనీయంగా తగ్గాయని చెబుతున్నారు.
అమెరికా జరిపే దాడులకు ఇరాన్ డ్రోన్ దాడుల ద్వారా సమాధానం ఇస్తోంది. అక్కడ యూఏఈ, ఖతార్ వంటి దేశాలలో అమెరికా సైనిక బలగాలు ఉన్న నేపథ్యంలో, వాటిని లక్ష్యంగా చేసుకుని ఇరాన్ దాడులకు తెగబడుతోంది. దీని కారణంగా విమాన రవాణా మరియు విదేశీ పర్యాటకులపై ఆధారపడిన పలు రంగాలు దుబాయ్లో తీవ్రంగా దెబ్బతిన్నట్లు తెలుస్తోంది. దీంతో అక్కడి పలు కంపెనీలు ఖర్చులను తగ్గించుకునే పనులపై దృష్టి సారించాయి.
ఆవేదన: అలాంటి పరిస్థితినే ఫిలిప్పీన్స్ దేశానికి చెందిన 44 ఏళ్ల జాయ్ వివాండా ఎదుర్కొంటోంది. ఆమె గత నాలుగు నెలలుగా ఉద్యోగం కోసం దుబాయ్ నగరంలోని పలు ప్రాంతాల్లో తిరుగుతోంది. ఇరాన్ వివాదంలో తలెత్తిన గందరగోళం వల్ల గత మార్చి నెలలో ఆమె ఉద్యోగం కోల్పోయింది. ఇప్పుడు తన నలుగురు పిల్లలను పోషించలేక తీవ్ర ఇబ్బందులు పడుతోంది. ప్రతిరోజూ అందరినీ ఉద్యోగం అడుగుతూ తిరుగుతున్నా తనకు ఎలాంటి పని దొరకడం లేదని జాయ్ వివాండా ఆవేదన వ్యక్తం చేసింది.
భారతీయుడు: అదేవిధంగా భారతదేశానికి చెందిన అకౌంటెంట్ ముజీబ్ రెహమాన్ కూడా దాదాపు ఇలాంటి అనుభవాన్నే ఎదుర్కొన్నాడు. ఇదిలా ఉండగా ఆయన మాట్లాడుతూ, “మా కంపెనీలో కూడా చాలా మంది ఉద్యోగాలు కోల్పోయారు. జీతాలు ఇవ్వడానికి సరిపడా నగదు చలామణి లేదు. ఇప్పుడు దుబాయ్లోని చాలా కంపెనీలు కొత్త వారిని ఉద్యోగాల్లోకి తీసుకోవడానికే ఆలోచిస్తున్నాయి” అని తెలిపారు.
పర్యాటకుల రాక తగ్గిపోవడంతో దుబాయ్లోని వివిధ సంస్థలు కూడా చాలా తీవ్రంగా నష్టపోయాయి. దీనివల్ల పలు కంపెనీలు నెలవారీ జీతాలు ఇవ్వడం ఆపేసి, ఇప్పుడు కేవలం కమిషన్ల ఆధారంగా మాత్రమే వేతనాలు అందిస్తున్నాయట. అది కూడా సాధారణం కంటే చాలా తక్కువగానే ఉంటోందని వలస కార్మికులు వాపోతున్నారు.
ఆర్థిక సహాయ ప్యాకేజీలు పనిచేయలేదు: యుద్ధం వల్ల పరిస్థితులు చేదాటిపోకుండా నిరోధించేందుకు యూఏఈ ప్రభుత్వం 680 మిలియన్ డాలర్లకు పైగా విలువైన ఆర్థిక సహాయ ప్యాకేజీలను ప్రకటించింది. అయినప్పటికీ, పరిస్థితులు చక్కబడలేదు. చాలా మంది కార్మికులు ఇప్పటికీ ఉద్యోగాలు ఊడిపోయే ప్రమాదాన్ని ఎదుర్కొంటున్నారు.
అమెరికా, ఇరాన్ మధ్య మధ్యలో కొన్ని రోజులు తాత్కాలిక యుద్ధ విరామం వచ్చినప్పుడు, అంతా సాధారణ స్థితికి వస్తుందని చాలా మంది నమ్మారు. కానీ, ఇప్పుడు మళ్లీ యుద్ధం ప్రారంభం కావడంతో అక్కడ ఉన్న వేలాది మంది వలస కార్మికులు తీవ్ర ఇబ్బందులను ఎదుర్కొంటున్నారు.