న్యూఢిల్లీ/టెహ్రాన్: కష్టకాలంలో ఆదుకున్న ఆపన్నహస్తానికి ఇరాన్ కృతజ్ఞతలతో కూడిన వీడ్కోలు పలికింది. ఇజ్రాయెల్-అమెరికా కూటమితో యుద్ధం చేస్తున్న ఇరాన్‌కు మద్దతుగా భారతీయులు కురిపించిన విరాళాల వెల్లువపై ఆ దేశ రాయబార కార్యాలయం (Embassy) భావోద్వేగ ప్రకటన విడుదల చేసింది. “ఇకపై డబ్బులు పంపవద్దు” అని కోరుతూ తమ బ్యాంక్ ఖాతాలను మూసివేస్తున్నట్లు ప్రకటించింది.
భారతీయుల మహా విరాళం: కాశ్మీర్ నుండి కన్యాకుమారి వరకు..
యుద్ధం కారణంగా ఆర్థిక ఇబ్బందుల్లో ఉన్న ఇరాన్‌ను ఆదుకోవడానికి భారతీయులు సాటిలేని మానవత్వాన్ని చాటుకున్నారు. ముఖ్యంగా కాశ్మీర్ లోయలో ప్రజలు పోటెత్తారు. కేవలం నగదు మాత్రమే కాదు.. బంగారు ఆభరణాలు, వెండి వస్తువులు, చివరకు ఇత్తడి, రాగి పాత్రలను కూడా విరాళంగా ఇచ్చి తమ దాతృత్వాన్ని చాటుకున్నారు.
గుండెల్ని పిండేసే ఉదంతాలు:
భారత్ నలుమూలల నుండి అందిన సాయం వెనుక ఎన్నో కదిలించే కథలు ఉన్నాయి:
- చిన్నారుల త్యాగం: చిన్నారి ఆడపిల్లలు తమ చెవి పోగులను విరాళంగా ఇవ్వగా, వందలాది మంది పిల్లలు తమ కిడ్డీ బ్యాంక్ (పిగ్గీ బ్యాంక్స్)లను పగలగొట్టి యుద్ధ బాధితుల కోసం ఇచ్చేశారు.
- లక్ష పలికిన కోడి పుంజు: ఒక వ్యక్తి తన కోడిపుంజును వేలం వేయగా, అది ఏకంగా రూ. 1.25 లక్షలు పలికింది. ఆ సొమ్మంతా అతను ఇరాన్ సహాయ నిధికే అందించాడు.
- వంశపారంపర్య గుర్తులు: ఒక వృద్ధురాలు తన పూర్వీకుల నుండి వారసత్వంగా వచ్చిన చివరి బంగారు ఆభరణాన్ని కూడా ఇరాన్ కోసం త్యాగం చేసినట్లు ఎంబసీ ఎంతో ఉద్వేగంతో గుర్తు చేసుకుంది.
ఇరాన్ ఎంబసీ భావోద్వేగ ప్రకటన:
“భారత ప్రజలు అందించిన అద్భుతమైన మద్దతుకు, సహకారానికి మేము రుణపడి ఉంటాము. విరాళాల సేకరణ కోసం మేము గతంలో కేటాయించిన బ్యాంక్ ఖాతాలను మరియు QR కోడ్‌లను ఇప్పుడు మూసివేస్తున్నాము. కాబట్టి, ఇకపై ఆ ఖాతాలకు లేదా ఎంబసీ పేరుతో ఉన్న మరే ఇతర ఖాతాలకు డబ్బులు పంపవద్దు” అని ఇరాన్ రాయబార కార్యాలయం అధికారికంగా కోరింది.