భారతదేశంలో ఎలక్ట్రిక్ వాహనాల మార్కెట్ అత్యంత వేగంగా వృద్ధి చెందుతోంది. పెట్రోల్, డీజిల్ వాహనాల తయారీ సంస్థలతో పాటు కొత్త స్టార్టప్ కంపెనీలు కూడా తమ ఈవీలను విడుదల చేస్తూ మార్కెట్‌ను ఆకట్టుకుంటున్నాయి. తాజాగా మధ్యప్రదేశ్‌లోని ఇండోర్ కేంద్రంగా పనిచేస్తున్న వింగ్స్ ఈవీ (Wings EV) అనే స్టార్టప్, దేశంలోనే అత్యంత చౌకైన ఎలక్ట్రిక్ వాహనాన్ని పరిచయం చేసింది.
చిన్న డిజైన్ – రాబిన్ ఈవీ: పక్షిలా చిన్నగా, ఒద్దికగా ఉండే డిజైన్ వల్ల దీనికి ‘రాబిన్’ అని పేరు పెట్టారు. ఇది చూడటానికి కారులా ఉన్నా, బజాజ్ క్యూట్ లాంటి ఒక ‘క్వాడ్రిసైకిల్’ (Quadricycle). నగరాల్లో ట్రాఫిక్ ఇబ్బందులు లేకుండా కారులో వెళ్లాలనుకునే వారికి ఇది చక్కని ప్రత్యామ్నాయం. ఇందులో 2+1 (ఇద్దరు పెద్దలు, ఒక చిన్న పిల్లవాడు) కూర్చునేలా సీటింగ్ అమరిక ఉంది.
ఫీచర్లు మరియు ధర: కేవలం 945 మిమీ వెడల్పు, 1560 మిమీ ఎత్తు ఉన్న రాబిన్ ఈవీని పార్క్ చేయడానికి ఒక మోటారు సైకిల్ పట్టేంత స్థలం సరిపోతుంది.
- బ్యాటరీ: 5.6 kWh బ్యాటరీ ప్యాక్ (ఫ్లోర్‌లో అమర్చబడి ఉంటుంది).
- రేంజ్: ఒక్కసారి ఛార్జ్ చేస్తే 90 కిలోమీటర్లు ప్రయాణిస్తుంది.
- వేగం: గంటకు గరిష్టంగా 64 కిమీ వేగంతో వెళ్తుంది.
- ఛార్జింగ్ టైమ్: పూర్తి ఛార్జ్ కావడానికి 5 గంటల సమయం పడుతుంది.
- ధర: ప్రారంభ ధర రూ. 1.99 లక్షల నుండి రూ. 2.99 లక్షల వరకు ఉంటుంది. టాప్ వేరియంట్ ‘X’లో ఏసీ (AC) సౌకర్యం కూడా ఉంది.