ఉత్తరప్రదేశ్‌లోని కాన్పూర్‌కు చెందిన 47 ఏళ్ల వ్యాపారి అమిత్ కుమార్, శనివారం రాత్రి తన దుకాణాన్ని మూసివేసి ఇంటికి తిరిగి వెళ్తున్నారు.
ఓం చౌరహా ప్రాంతం సమీపంలో వెళ్తుండగా, ఒక ముఠా నడిరోడ్డుపై మద్యం సేవిస్తూ.. వారిలో ఒకడు బాటసారులు వెళ్లే దారిలోనే బహిరంగంగా మూత్రవిసర్జన చేస్తుండటాన్ని ఆయన గమనించారు.
బహిరంగ ప్రదేశంలో అసభ్యంగా ప్రవర్తిస్తున్న ఆ ముఠాను అమిత్ కుమార్ ప్రశ్నించి, నిలదీశారు. దీంతో తీవ్ర ఆగ్రహానికి గురైన ఆ మందుబాబుల ముఠా, అమిత్ కుమార్‌ను చుట్టుముట్టి ఇటుకలతో, పిడిగుద్దులతో విచక్షణారహితంగా దాడి చేసింది. ఈ దాడిలో తల, శరీర భాగాలపై తీవ్ర గాయాలు కావడంతో అమిత్ కుమార్ రక్తపు మడుగులో కుప్పకూలిపోయారు.
స్థానికులు వెంటనే ఆయనను రక్షించి ఆసుపత్రికి తరలించగా, రెండు రోజుల పాటు మృత్యువుతో పోరాడి చికిత్స ఫలించక ఆయన ప్రాణాలు కోల్పోయారు. ఈ ఘటనపై పోలీసులు కేసు నమోదు చేసి, సీసీటీవీ దృశ్యాల ఆధారంగా నిందితుల కోసం ముమ్మరంగా గాలిస్తున్నారు. “రహదారిపై ఘర్షణ పడి గెలవడం కంటే, కుటుంబం కోసం క్షేమంగా ఇంటికి చేరుకోవడమే ముఖ్యం; తాగుబోతుల పట్ల అప్రమత్తంగా ఉండండి” అనే అవగాహన సందేశం ప్రస్తుతం సోషల్ మీడియాలో విపరీతంగా ప్రచారమవుతోంది.